Nature Foundation Sint Maarten (NFSXM) y Ministerio de Husticia a lansa e Protection through Biosecurity Project: A Strategic Initiative for Sint Maarten (Proyecto di Proteccion via Bioseguridad: Un Iniciativa Strategico pa Sint Maarten), cu tin como meta pa fortalece e capacidad di e pais pa preveni introduccion di specienan invasivo, combati trafico ilegal di bida salvahe, y mihora e implementacion di acuerdonan internacional di biodiversidad, incluyendo e Convenio riba Trafico Internacional di Specienan di Fauna y Flora Salvahe Amenasa (CITES). E proyecto tambe ta busca pa di e forma aki fortalece e coordinacion entre e actornan clave envolvi den proteccion di e fronteranan y e medio ambiente natural di Sint Maarten.
“Specienan invasivo y trafico ilegal di bida salvahe mas y mas ta pone nos bida marino y comunidadnan local na peligro. Pa mi, proteha nos fronteranan ta nifica tambe proteha nos medio ambiente natural contra menasanan cu por tin consecuencianan duradero pa nos isla. E iniciativa aki ta refleha nos compromiso pa proteha e ecosistemanan y recursonan natural mes di cual nos tur ta depende,” e Minister di Husticia, Nathalie Tackling, a declara.
Algun di e specienan mas comun cu ta wordo importa y exporta for di Sint Maarten cu ta cai bou di e listanan di CITES ta inclui carco (queen conch), caviar, y varios specie di parha. E Convenio ta cubri mas di 36.000 specie rond mundo, locual ta haci e cumplimento un tarea dificil y specialisa. Islanan chikito desaroya manera Sint Maarten ta funciona como un hub (centro) pa e region, resultando den un bolumen halto di mercancia importa, locual ta crea desafionan grandi di cumplimento pa e oficialnan local.
“Bioseguridad ta trata di proteha e pueblo, economia, y recursonan natural di Sint Maarten contra riesgonan cu hopi biaha ta pasa desapercibi te ora cu daño significante a drenta caba. Door di fortalece e implementacion di CITES y mihora e coordinacion entre actornan local y regional, nos ta invertiendo den un futuro mas resiliente pa e isla,” e Director di Nature Foundation, Leslie Hickerson, a bisa.
Un elemento clave di e proyecto aki di 18 luna lo ta e introduccion di un Oficial di Bioseguridad dedica structuralmente dentro di Nature Foundation Sint Maarten. E oficial aki lo traha estrechamente cu autoridadnan di cumplimento local y regional, dunando apoyo tecnico, coordinando oportunidadnan di entrenamento, y fortaleciendo accionnan regional. Mediante e apoyo extra aki, e proyecto ta busca pa mihora e esfuersonan di deteccion, prevencion, y contesta, miertras ta traha riba capacidad a largo plaso pa proteccion di biodiversidad.
Protection through Biosecurity ta wordo financia pa BESTLIFE2030 (Biodiversity and Ecosystem Services in Territories of European Overseas), un mecanismo di subsidio enfoca riba preservacion y restauracion di biodiversidad den e regionnan ultraperiferico (OR) y Pais y Teritorionan PTU (OCT) di Union Europeo, cu ta fungi como hogar pa un biodiversidad rico pero cu tambe ta enfrenta menasanan significante di cambio climatico.
Co-financia pa Union Europeo. Sinembargo, e bistanan y opinionnan expresa ta unicamente esunnan di e autor(nan) y no necesariamente ta refleha esunnan di Union Europeo of CINEA. Ni Union Europeo ni e autoridad cu ta duna e subsidio por wordo teni responsabel pa esakinan.