Minister di Salubridat, Medioambiente i Naturalesa di Kòrsou, Zita Jesus Leito, minister di Turismo, Salubridat i Deporte di Aruba, Danguillaume Oduber, minister di Salubridat, Desaroyo Sosial i Asuntunan di labor di Sint Maarten, Richard Panneflek i sekretario di estado di Salubridat, Bienestar i Deporte, Paul Blokhuis, ku firmamentu di un dokumento di desishon riba djamars 9 di febrüari, ofisialmente a akordá lantamentu di un kooperashon entre e hòspitalnan riba e islanan Kòrsou, Aruba, Sint Maarten, Boneiru, Saba i Sint Eustatius.
“Dutch Caribbean Hospital Alliance” (DCHA) den forma di un kooperativa lo bai realisá e meta komun pa redusí vulnerabilidat i dependensia, pero prinsipalmente pa por garantisá kontinuidat di kuido médiko spesialisá den futuro i pa oumentá kalidat i disponibilidat di kuido médiko spesialisá kaminda ku esei ta posibel. E mishon di DCHA ta: “Suministro di e mihó kuido médiko lokal i regional pa medio di un kooperashon ankrá entre e paisnan den Reino i partnernan stratégiko, kaminda bienestar di nos pashèntnan, mantenshon di un situashon finansiero ekonómiko saludabel i nos balornan kultural ta garantisá ta bin na promé lugá.”
Na e momentunan akí lantamentu di e kooperativa ta den un asina yamá ‘kwartiermaker fase’. Intenshon ta pa duna e señal ofisial pa e kooperativa di hòspital ranka sali den e promé kuartal di e aña akí.
E mandatarionan di e 4 paisnan di Reino tin tur konfiansa ku intensivashon di e kooperashon entre e hòspitalnan lo mehorá kalidat i kontinuidat di kuido pa e habitantenan di e parti karibense di Reino”.
