Bonaire Human Rights Organzation (BHRO) i Muhernan Fuerte Bonaire, ala femenino di Partido Pueblo Progresivo, ku orguyo ta anunsiá e éksito di nan lektura públiko ku a tuma lugá resientemente, riba futuro i derechonan humano di Boneiru. E evento a atraé un públiko I yeno kompletu, demostrando e gran interes di komunidat pa autodeterminashon di Boneiru i rekonesementu internashonal.
E lektura a kuminsá ku un bon biní kaluroso i humilde, duna pa un hoben di Boneiru, Gairo Frans, kende su palabranan a pone un tono di unidat, refleho i partisipashon komunítario.
Davika Bissessar Shaw, Presidenta di BHRO, a reflehá riba e 985 dianan ku James Finies a pasa den eksterior defendiendo Boneiru na nivel internashonal den Latinoamérika, Karibe, Norteamérika i Europa. E a presentá fotonan dokumentando su reunionnan ku presidentenan, promé minister, embahadornan, rapporteurnan di Nashonan Uni i NGO-nan global, subrayando kon e esfuersonan aki a halsa bos di Boneiru riba e esenario mundiál.
James Finies, Fundadó di BHRO i Líder Polítiko di Partido Pueblo Progresivo, a duna un presentashon amplio tokante e benefisionan di pone Boneiru bek riba e Lista di Teritorinan Sin Propio Gobernashon, No-Autónomo di Nashon Uní. El a detaya e ventahanan legal, sosial i ekonómiko pa e isla, miéntras ku el a repasá e konteksto históriko i e kampaña kontinu pa autodeterminashon.
Sedney Marten, Presidente di Movemento pa Kambio, a toká e públiko profundamente ku un poema profundo I sentimental, “Kome i Lembe”, resaltando e signifikashon emoshonal i kultural di e realidat aktual riba nos isla Boneiru.
Klaridat Legal for di Perspektiva di Nashon Uní:
E punto mas sobresaliente di e lektura, “Por Boneiru wòrdu pone bèk riba e Lista despues ku e a wòrdu kita for di dje na 1955?”, a wòrdu presentá pa Profesor Dr. Byron-Cox, un abogádo di Nashon Uní spesialisá den derecho públiko internashonal. El a splika klaramente kon pone Boneiru bek riba e lista ta proseduralmente I legamente posibel, dunando klaridat i dunando speransa na e komunidat.
Keval Anthony Bissessar, LLM, a representa fuertemente e presensia di hobenan di Boneiru, a komparti e testimonio riba e poder di unidat, referiendo na trayektoria históriko di Aruba i e legado di Betico Croes. El a stimulá Boneirunan pa “kuminsá, start ku un papel blanku” i definí nan propio futuro huntu.
E públiko a mustra un nivel haltu di partispashon aktivo I entusiasmo i apresio pa e klaridat, ekspertiso i vishon ku a wòrdu komparti. Hopi persona a ekspresá speransa i determinashon pa sigui sostené e lucha internashonal kontinou di Boneiru.
Hopi remarkabel i desepshonante tabata ku ningun politiko skohe pa pueblo no a mustra interes I no tabata presente i a briya pa nan ausensia.
BHRO ta konsiderá e lektura aki komo un paso grandi I importante den eduká, uní i empoderá e pueblo di Boneiru, reafirmando e lugá legitimo di Boneiru den diskushonnan global riba autodeterminashon i derechonan humano.
