E proposicion pa un Ley di consenso di Reino finansa publico duradero Aruba
(HOFA) ta bay Raad van State di Reino pa conseho. Conseho di Minister di
Reino a bay di acuerdo cu esey awe. Cu esey, despues di finalisa e consulta, a
dal atrobe un siguiente paso pa realisa e proposicion di ley aki di Aruba y
Hulanda conhunto.
Den e ley di consenso di Reino HOFA, tin reglanan stipula pa logra y mantene
finansa publico di Aruba solido. Un presupuesto responsabel y bon maneho
financiero ta contribui na esey. E ley di consenso di Reino ta directamente asocia cu
e ‘Ordenansa Nacional pa garantisa finansa publico duradero (Lwho)’. Esaki ta un
ley di pais Aruba mes. E normanan den e ley di Reino y e ordenansa nacional ta
basa riba recomendacionnan di Fondo Monetario Internacional.
Gastonan di interesnan mas abou
Unabes cu e ley drenta na vigor, Aruba por haci uzo di un facilidad di fiansa cerca
Hulanda. Asina e pais por presta placa pa haci inversionnan publico bou di e mes
condicionnan faborabel cu Hulanda tin. Ademas Hulanda ta dispuesto pa refinancia
un parti di e fiansanan Arubiano riba mercado di capital Merikano. Ademas a palabra
cu Aruba lo bay paga un interes mas abou pa e fiansa cu el a haci cerca Hulanda
durante e pandemia di Corona. Tur e palabracionnan aki ta percura pa baha e
gastonan di interes di Aruba. E interes cu Aruba ta spaar por ser uza pa inversionnan
den propio pais, manera por ehempel den enseñansa, cuido y economia.
Secretario di estado di Asuntonan Interno y Relacionnan den Reino Eric van der
Burg: “Atrobe a dal un paso importante den direccion di finansa publico solido pa
Aruba. Hulanda y Aruba ta trahando hunto desde medio 2024 riba e proposicion di
ley, di manera cu gobierno Arubiano, riba termino mas largo tambe, por haci mas
inversion cu ta beneficia habitantenan y economia. Cu esaki ta regla finansa publico
duradero, supervision y facilidad di fiansa den un ley di Reino, mescos cu pa Corsou
y Sint Maarten. Mi ta contento cu hunto nos ta pone nos esfuerzo bou di esaki.”
Prome Minister di Aruba Mike Eman: “Esaki ta un momento importante di trankilidad
pa Aruba y Reino. Specialmente den un mundo cu ta bira cada bes mas turbulento y
impredecibel, ta crucial cu confiansa, stabilidad y colaboracion ta existi dentro di
Reino. Trahando hunto, nos por cumpli mihor cu e retonan di nos tempo y traha riba
inversionnan cu ta sirbi e Biennan Comun di Aruba y di Reino.”
Ley di consenso di Reino Finansa Publico Duradero Aruba atrobe un paso mas cerca
