Featured Politica Morto

Lider di AVP, mr. Mike Eman En Memoriam Digna-Lacle Herrera


Den curason di e escudo oficial de Aruba tin un cruz di plata. Central den e escudo e cruz ta trece hunto e diferente facetanan di nos sociedad cu ta simbolisa den nos escudo nacional. Den nos escudo e simbolonan aki, di nos sistema constitucional, nos pilarnan economico, nos paisajenan y e caracteristicanan di e Pueblo Arubano no ta para aisla di otro. E cruz ta conecta e pilarnan di nos sociedad na otro y ta duna nan un significacion mas cu loke ta evidente: un compas moral. Cu e cruz memei, e pilarnan di nos comunidad ta wordo conecta na un proposito mayor, un mision celestial.                                                                            

 

Asina Sra. Digna Lacle Herrera a mira su mision den bida. Conecta nos bida na un mision mas grandi. Duna un contenido moral, yuda forma un base firme di conocemento y conviccion di norma y etica den e fundeshi di nos sociedad. Conecta tur faceta di bida na un mision trancendental. Den su trabaonan como maestro di school, den su escrituranan poético, den su mision politico y den esencia di su ser, como ciudadano ehemplar, a resalta semper Digna su empeño, sin descanso, pa crea un coneccion significativo entre nos realidad y e significacion di nos existencia. Un bastion di moral, of den palabra di Digna, un tabla di moral pa nos Pais y nos Pueblo.                                       

 

Para central den nos comunidad y cu un bunita variedad di ocupacionan, Digna a sa di conecta curasonan, cultiva almanan cu devocion, inspira semper pa tene na balornan grandi y kere den e mision di Pais Aruba. Cu principionan grandi, cu curashi y un orientacion cla y fiho, Digna a sirbi Aruba den un forma ehemplar.

 

Cu cada palabra, gesto, educacion y labor, Digna a yuda pone e base aki di norma y valornan na e fundeshi di nos sociedad. Mescos cu e cruz den nos escudo, Digna a tume como su proposito den bida pa duna un orientacion, manera un compas moral ta duna direccion y interrelacion na nos existencia, na nos intuicion, na nos mision, vision y destino.     

Den Partido AVP e tabata tambe e compas moral. Semper para na banda di locual ta husto y correcto. Semper traspasando e lesnan di bida cu un dosis grandi di experiencia, conocemento y orientacion amplio y puro. Pesey e formacion di e noble carera di sirbidornan publico den seno di Partido AVP a haya forma den un fundacion dedica na su ehempel, Fundacion Formacion Político Digna Lacle-Herrera. 

 

Con nos ta mira comunidad, ciudadania, nan rol, responsabilidad y compromiso, ta worde inculca for di perspectiva di e esencia di bida, basa riba un doctrina fuerte di Fe, creencia y balornan intrinsico y virtudnan grandi: amor pa prohimo, honestidad, misericordia, convivencia, cordialidad, modestia y humildad. Den nos historia, e balornan grandi aki semper a hunga un papel importante den formacion di nos sociedad. Den orientacion riba escohencianan den bida, e compas moral aki, simboliza pa e cruz den nos escudo, a duna direccion. Den e mesun forma Digna Lacle-Herrera a dedica su bida na duna direccion y crea un interelacion entre tur faceta di bida basa riba balornan fundamental.

 

Un elemento central den Digna su bida tabata semper su Fe den Dios y e aplicacion di esaki den practica, cu a fortalece su rectitud y a dune e mision pa comparti lesnan di esencia di bida den tur forma cu su talentonan grandi a dun’e. Digna ta laga den nos curason e conviccion di nos dependencia di boluntad di Dios y su guia pa perfecciona nos mes y nos Pais. Nos ta spera cu e balornan grandi aki y e principionan y virtudnan di Digna, lo pasa di un generacion pa otro y keda inmortaliza cu e formacion den e fundacion cu ta carga su nomber. Nos tur, cu destino a duna e oportunidad di concoce Digna y siña di dje, lo keda biba pa semper cu e compas di su balor y virtudnan.  Cu nos Creador duna Digna un lugar bunita y bon merici den su Reino.

Related posts

Conoce un poco mas di Elite K9 Dog Training Club

EA News Author

Anunsio di Morto: A fayese Sra. Maria P. Tromp-Colina Vuida di Adelberto “Pews”Tromp

EA News Author

Prome minister a asisti na conferencia di fta riba tema di flexibilisacion laboral

EA News Author

Leave a Comment