E situacion financiero cu e hospital ta pasando aden actualmente no ta uno saludabel y ta generando gran preocupacion pa e impacto cu e por tin riba e cuido medico y e salud di e ciudadanonan. Un investigacion debido ta necesario. A pesar di e gravedad di e caso, e silencio hermetico di Minister di Salud, Mervin Wyatt Ras , ta keda un punto di cuestionamento, ya cu no ta wak un vision, un maneho ni un atencion debido pa soluciona e crisis aki. Aparentemente tin un investigacion andando.
E preocupacion ta escala debi cu varios proveedor (vendors) a cuminsa para e entrega di medicamentonan y materialnan esencial cu ta wordo uza pa e pashentnan den hospital. E falta di pago of tardansa aki ta pone e bida y salud di hopi persona cu ta depende di e remedi- y materialnan aki directamente den peligro. Keda sin paga vendors y bin cu un mashin cosmetico di un Tanki hiperbarico ta mustra realmente kico ta e maneho y e prioridad cu hospital tin , keda sin paga su vendors nan pa un mashin cosmetico di un Tanki hiperbarico cu ta cura heridanan y ora di operacion e herida ta cera mas lihe.
Segun parlamentario Dangui Oduber loke ta haci e situacion aki mas incomprendibel ta cu e entidad di seguro (AZV) ta contando cu un surplus significante di alrededor di 350 miyon florin. Na comparacion, durante e periodo di pandemia e cuenta coriente tabata rond di 54 miyon florin y toch nunca a yega na e punto cu e proveedornan a stop di suministra e hospital. na hospital tin hopi duda den dje.
Ta wordo exigi transparencia, claridad y responsabilidad di parti di e Minister di Salud, Director di AZV, Raad van bestuur y Hunta di supervision. Segun parlamentario Dangui Oduber ta necesario cu e mandatario ta presenta na Parlamento pa informa tanto e parlamentarionan como e pueblo di Aruba kico exactamente ta pasando. E prioridad absoluto mester ta pa garantisa y duna e trankilidad na tur pashent cu e suministro di medicamento y material medico no ta keda interumpi na ningun momento.