Cu e inicio di temporada di horcan 2025, Aruba Hotel & Tourism Association (AHATA) a distribui un guia basico pa preparacion di horcan na su miembronan. E guia ta aproba pa Crisis Management Office Aruba (CMO) y ta un recurso balioso cu por asisti negoshi cu nan preparacion. E iniciativa proactivo aki ta subraya e compromiso di AHATA pa yuda su miembronan ta bon prepara durante e temporada aki.
E guia basico pa preparacion di horcan ta compila informacion y pasonan practico pa planificacion y mitigacion di emergencia. Diseña pa asisti miembronan di AHATA cu nan planificacion di siguridad y protocolnan di preparacion, e guia ta inclui seccionnan clave manera un lista di contacto di emergencia, un checklist pa accionnan prome, durante y despues di un tormenta, y materialnan di concientizacion di horcan (por ehempel, kico ta un horcan, diferencia entre un “hurricane watch” y “hurricane warning”).
AHATA kier stimula tur su miembronan pa uza e recurso aki pa revisa y incorpora informacion relevante den nan protocolnan interno, ademas di percura cu nan personal ta debidamente entrena y desaroya un plan di comunicacion cla y responsabel. Nos ta extende e mesun invitacion aki na henter comunidad y tur negoshi na Aruba pa tambe considera tuma pasonan pa ta bon prepara pa e temporada di horcan. Preparacion y coordinacion ta vital pa nos comunidad, bishitantenan, y propiedadnan durante e temporada aki.