Recientemente, Minister di Husticia, Integracion, Transporte Publico y Energia, mr. drs.
Arthur Dowers, a ricibi un presentacion amplio for di ehecutivonan di Compania
Arubano di Petroleo (CAP) relaciona cu e status di trabaonan di exploracion di petroleo
y gas natural. E reunion a enfoca riba desaroyo energetico sostenibel y responsabel.
Durante e presentacion, CAP a duna un update di e trabaonan cu ta den proceso door
di Armstrong Oil & Gas den cuadro di exploracion di petroleo of gas natural den awanan
teritorial rond Aruba. E proceso di exploracion ta avansa conforme planificacion tecnico,
respetando tur norma internacional y rekisito legal cu ta aplica pa e tipo di actividad aki.
E siguiente fase ta determina cua sitio ta mas prometedo pa inicia cu boramento, un
proceso cu tambe lo rekeri su tempo y cautela. E fase den cual Armstrong Oil & Gas ta
aden, ta uno hopi costoso pero necesario pa por yega eventualmente na boramento.
Esaki no ta un proceso rapido, sino un trayecto tecnico cu lo dura varios luna prome cu
tin claridad total. E fase actual ta enfoca riba investigacion cientifico, coleccion di data y
evaluacion geologico, cu lo sirbi como base pa cualkier decision den futuro.
Transparencia, responsabilidad y interes nacional ta keda central den tur paso cu ta
considera.
Minister Dowers a enfatisa cu gobierno lo sigui monitorea e proceso cu hopi atencion,
teniendo como prioridad proteccion di medio ambiente, siguridad di comunidad y
beneficio economico pa pueblo di Aruba. Cualkier desaroyo potencial den sector
energetico mester tuma luga den un marco di sostenibelidad, cu respet pa nos
generacion actual y futuro.
