PoliticaFeaturedLocal

Minister Maduro di finansa ta brinda informacion corecto riba e interes cu Aruba ta paga riba fiansanan haci riba e mercado internacional di capital

Minister Maduro

Como reacion riba e articulo ‘Tasa di interes pa Aruba: un perspectiva historico’ di sr. Lincoln Gomez di dia 18 di october 2023:

E pensamento y comentarionan di sr. Lincoln Gomez riba interes cu Aruba ta paga, ta robes

Minister Maduro di Finansa a tuma nota di e articulo  ‘Tasa di interes pa Aruba: un perspectiva historico’ di sr. Lincoln Gomez di dia 18 di october 2023 riba e tema di interes riba e fiansa haci cu Hulanda pa surpasa e pandemia di COVID-19. Den e articulo e abogado ta sugeri cu historicamente Gobierno di Aruba lo ta ‘acepta’ interes halto despues di ta negosha malo pa motibo di un strategia di debe cu no ta diversifica. Na un forma elocuente y manera un experto riba finansa publico, abogado Gomez a presenta na su lectornan hopi informacion cu lamentablemente ta robes. Pa evita mal comprondemento riba e topico aki di finansa publico di Pais Aruba, Minister Maduro di Finansa ta brinda informacion corecto riba e interes cu Aruba ta paga riba fiansanan haci riba e mercado internacional di capital.

Interes riba mercado di capital no por wordo ‘negosha’
Mester haci e remarke cu Sr. Gomez su punto di salida, cu e interes cu Aruba ta paga pa presta placa riba mercado di capital internacional ta algo cu por wordo negosha, no ta corecto. Realidad ta cu interes riba fiansa haci riba mercado local y internacional, ta wordo haci na un manera full diferente di locual sr. Gomez ta pensa y ta vocifera. Esaki no ta interes cu por wordo negosha ora di cumpra auto, cumpra cas of haci un prestamo personal. Riba Wall Street e mercado di capital ta formula interes na un forma totalmente diferente. Esaki ta sosode pa medio di un sistema di subasta na unda miles di inversionista grandi ta bin hunto y ta competi cu otro. Competencia ta pone preshon riba e interes y di e forma aki ta saca for di mercado e interes mas abou cu tin disponibel. E ta un sistema sofistica cu e inversionistanan mas grandi na mundo a scohe pa traha cune. E ta un concepto fundamental den e sistema cu ta wordo organisa pa Securities and Exchange Commission (SEC), pasobra ta principio di  ‘price mechanism of a free market’ cu ta e forma mas eficiente y transparente pa yega na e mihor interes cu tin. E sistema aki ta e base di loke tur hende por mira riba Bloomberg. Ta un sistema full transparente na unda no tin cuestion di sinta na mesa den camber scur cu abogadonan dubioso pa negosha pa yega na un miho ‘deal.’

Perspectiva historico presenta ta robes
Ademas di presenta un pensamento robes riba fihamento di interes, e articulo di sr. Gomez ta presenta un perspectiva historico di pago di interes door di Aruba cu tambe ta grandemente ekiboca. Aruba tin casi 20 aña di experiencia cu e sistema di Wall Street, na unda no ta traha cu e practica di ‘acepta’ un nivel di interes of laga di ‘acepta’, sino cu e sistema di subasta. E sistema di subasta y competencia hiba na Wall Street ta causa e ‘price tension’ cu ta hiba na e interes di mas eficiente posibel na mundo. Si bo no ‘acepta’ e interes ey, bo ta gaña bo mes, ya cu mercado ta mustrabo den forma abierto y transparente cual ta e interes optimal cu bo por logra. Perspectiva historico corecto ta cu ta unicamente den e financiamiento cu Hulanda pa e fiansanan di COVID-19, Aruba ta wordo confronta cu un sistema no-transparente di fiha interes. Den e caso aki ta Hulanda unilateralmente por a dicidi e interes y a impone un interes, pasobra e no mester a pasa un proceso di competi den ful transparencia. E prestamo cu Hulanda ta un ‘non-market deal’, den cual e parti di ‘pricing’ (interes) tabata ineficiente, ya cu ta Hulanda so ta e unico inversionista cu por a fiha e interes. Hulanda a probecha di e posicion fuerte di e monopolio aki y a fiha e interes na 6.9%. Pues no ta cuestion cu Aruba tur tempo a negosha malo of a djies acepta interes halto sin mas, manera ta wordo sugeri den e articulo di sr. Gomez.

Ponencia robes di falta di diversificacion den strategia
Den e articulo sr. Gomez ta papia di un patronchi di interes cu ta subi, y ta saca e conclusion cu esaki ta debi cu e strategia hiba pa Aruba no ta bon, cu esaki falta diversificacion y cu e ‘approach’ lo ta ‘one-dimensional’. Tur esakinan ta pensamento ekiboca y incorecto, cu ta basa riba un falta di conocemento basico di e materia. Manera indica, no ta Aruba su profesionalnan, sino e mercado di capital ta esun cu ta determina e nivel di interes. E realidad aki ta conta pa Aruba y pa e resto di mundo tambe, pues no ta pa falta di un bon strategia of conocemento di e mercado di capital.

Confiansa den e team di Aruba
Finansa publico ta keda un tereno dificil y e dinamica di e transaccionnan cu ta tuma luga riba e mercado internacional di capital ta exigi conocemento specialisa. Minister Maduro di Finansa tin e pleno confiansa den e team di Aruba cu ta percura pa e trabounan wordo haci pa Aruba por yega na e fondonan necesario riba e mercado internacional di capital. Ta profesionalnan Arubiano cu a traha den e mundo di capital internacional y cu ta wordo asesora tambe pa abogadonan cu conocemento specialisa riba e tereno financiero. Sigur den e dianan aki cu hopi hende ta vocifera nan opinion riba e interes cu Aruba a haya di Hulanda pa refinancia e debe di COVID-19, ta bon pa nos tene na cuenta e informacion di instancianan oficial y no bay ‘zomaar’ tras di opinion, comentario y conclusion di ‘faux experts’ cu no tin suficiente conocemento di e materia.

Related posts

Minister Dangui Oduber a ricibi e embahador Aleman staciona na Hulanda

EA News Author

Inflashon ta baha na Sint Eustatius i Saba

EA News Author

Cambio den prijs di productonan petrolero 8 di maart 2023

EA News Author

Leave a Comment

Whatsapp Message