Pa e di dos aña consecutivo, un grupo di 22 alumno di La Salle College lo biaha pa Belgica, pa participa den un proyecto di mobilidad di studiante (student mobility). E iniciativa aki, cu a cuminsa aña pasa, ta posibel danki na e acreditacion cu e scol a ricibi y e fondonan di e programa Erasmus+.
Segun e directora di La Salle College, Rudiane Engelhart, e proyecto aki a nace na momento cu e scol a establece un red di contacto cu institucionnan di enseñansa na Belgica, bou di guia di Hogeschool Gent y Universidad di Gent. E meta principal ta pa duna e alumnonan di MAVO e oportunidad pa biba y sinti kico ta encera ser un studiante internacional durante un siman intensivo.
E studiantenan lo wordo hinca directamente den e sistema educativo Belgico, unda nan lo sigui klasnan segun un rooster stipula y lo participa den e bida di estudio diario. E experiencia aki ta diseña pa duna e hobennan un bista mas claro y realistico di kico e ta nifica pa bay studia afo despues di termina nan trayecto escolar na Aruba.
E programa cu ta wordo ofrece un variedad amplio di disciplina y orientacion profesional. Entre e ramonan cu e alumnonan lo explora tin gezondheidszorg, biotechniek, ICT, y databeheer. Ademas, e studiantenan lo haya exposicion den areanan tecnico y creativo, manera bouwtechnieken, houttechnieken, y decor en etalage un orientacion cu no ta wordo ofrece na Aruba.
Engelhart a destaca cu e panorama di estudio pa e studiantenan di Aruba a cambia e ultimo añanan. Filial cu antes e enfoke principal tabata unicamente riba Hulanda, awe e horizonte di e studiantenan ta mas internacional, cu paisnan manera Canada, Merca, y Belgica posicionando nan mes como alternativanan atractivo pa educacion superior.
Cu e di dos grupo aki di 22 alumno, La Salle College ta continua cu su compromiso di habri porta y amplia e perspectiva profesional di su studiantenan pa nan futuro academico.
