Local

Minister Chris Romero a duna atencion na e grupo di taxista cu a manifesta diaranson mainta


ORANJESTAD, Aruba

Un grupo di taxista cu, haciendo uzo di nan derecho constitucional, a manifesta dilanti bestuurskantoor. E manifestacion aki a bay na atencion di Minister Chris Romero, unda cu sra. Linda Orman, como vocero di e grupo, a entrega e Titular di e Cartera di Transporte un manifiesto cu ta consisti di 8 punto pa Gobierno tuma na consideracion.

Di su parti, Minister di Transporte, sr. Chris Romero, a gradici e grupo di taxi pa nan presencia y a tuma e manifiesto splicando cu ta trahando caba riba varios di e puntonan menciona. Minister Romero a coincidi cu e grupo cu tin algun otro punto cu mester ahusta y a compromete su mes na haci esaki pronto.

Tambe, Minister Chris Romero a reflexiona riba e manifestacion di e siguiente manera: “Maske si ta 1% mes di nos ciudadania kier manifesta, nos Gobierno ta duna respet y atencion na cada discrepancia cu por tin. Awe mi a tuma e manifiesto di un grupo di taxista cu a bin Bestuurskantoor pa vocifera nan deseonan. Mi tin cu bisa si, cu mi tin cu duna oido na tur esnan cu ta den poder di un permiso pa taxi, cual ta 450 persona. E ta bira complica ora cu como Gobierno, bo ta haya diferente argumento y peticion ta drenta for di diferente grupo di taxista. Sinembargo, nos ta tumando tur preocupacion di nos taxistanan den consideracion y ta trahando proactivamente pa yega na un solucion beneficioso pa tur 450 taxista cu tin na Aruba. Di e forma aki nos ta respeta e derecho fundamental y democratico di cada ciudadano, pasobra ser humano ta keda central pa Gabinete Wever-Croes”.


Related posts

Minister Xiomara Maduro: Mas tempran nos sa, mas tempran nos por wordo yuda

EA News Author

Estudio pa Adulto tambe ta bay online

EA News Author

Fundacion Lanta Papiamento (FLP) a reuni cu G297

EA News Author

Leave a Comment