ORANJESTAD,Aruba
E pandemia di COVID-19 a pone cu como pais, Aruba tin di bay adapta na cierto reglanan di emergencia temporario, pa asina evita lo mas posibel pa e virus aki sigui plama den nos comunidad.
E crisis reinante den cuadro di e Coronavirus a obliga Gobierno di Aruba na tuma diferente decisionan pa proteha un y tur ariba nos isla, poniendo semper e ser humano central. Manera ta conoci, e decision di mas reciente cu a keda tuma ta e asina yama ‘Shelter in place’, cual Prome Minister a anuncia publicamente, y esaki tin tur su obligacion y consecuencianan.
E crisis di Coronavirus a obliga Minister di Transporte, Comunicacion y Sector Primario na introduci un maneho temporal pa botonan local, como tambe pa e proceso di renobacion di permiso pa nabega den awanan di Aruba (vaarvergunning).
Considerando e necesidad pa mantene actividadnan maritimo local, especialmente cerca esnan cu ta depende di piscamento como nan sosten financiero, e Titular di e Carteranan di Transporte, Comunicacion y Sector Primario, sr. Chris Romero, a determina un maneho temporal pa loke ta trata e ‘vaarvergunning’. E maneho nobo y temporal ta apunta cu e periodo di valides di un ‘vaarvergunning’ cu a caduca, of lo caduca den tempo corto, lo keda automaticamente prolonga cu un periodo di 6 luna mas. Esaki ta nifica cu propietarionan di boto por nabega pa 6 luna mas sin cu tin mester di tramita un ‘vaarvergunning’ nobo. Dus, no mester acudi na Directie Scheepvaart pa haci ningun tramite, como cu e ‘vaarvegunning’ actual ta keda cu valides te cu un proximo aviso, sin importa cu e ta caduca.
E maneho nobo y temporal menciona lo por wordo adapta segun e desaroyo di e crisis actual relaciona cu e COVID-19. Segun e circumstancianan reinante mehora, lo introduci cambio si ta necesario.
