Diamars atardi durante un bunita ceremonia na Kapel di Alto Vista, den presencia di invitadonan y comunidad a tuma luga e acto caminda Kapel di Birgen di Alto Vista a ricibi e seyo oficial como monumento y ta bira e prome monumento priva protehi y tambe a anuncia e plan di embeyesimento.
E acto a tuma luga despues di un bunita Santo Sacrificio di Misa efectua pa Monseigneur Secco y Pastor Andres Vicario Episcopal di Aruba. Minister Xiomara Maduro, Minister Dangui Oduber y Director Interino di Oficina di Monumento Raul Gei a hiba palabra durante e acto oficial.
Minister di Finansa y Cultura Sra. Xiomara Maduro den su discurso a comparti un poco historia di e luga religioso di Kapel di Alto Vista cu tin un gran balor pa Aruba. E ta un luga religioso caminda hopi hende ta bin practica nan fe y medita den un ambiente di trankilidad y pas. Ademas Kapel ta hopi bishita pa hopi creyente den temporada di Cuaresma, pa e caminda di cruz. Un sitio hopi sagrado cu ta disfruta di hopi respet pa nos creyentenan. Tambe nos Kapel di Alto Vista ta un luga hopi frecuenta pa nos bishitantenan cu ta bin di exterior, ya cu e ta un icono di nos Pais.
Minister Maduro a sigui trece dilanti cu e caminda di stashi ta di gran importancia pa su balor arkitectonico historico y tipologico. Den e vecindario ta encontra rastronan arkeologico cu ta un recuerdo extraordinario di con e sociedad indigino Arubano tabata biba na 1816.
Tambe e mandatario a accentua cu recientemente Kapel a haya un actualisacion cu instalacion di panelnan solar, cu ta haci posibel cu e por ricibi bishita di creyentenan tambe den oranan mas laat di dia.
Kapel di Alto Vista ta e prome misa na Aruba y tin un historia di gran balor pa nos Pais Aruba. Ta un orguyo como Minister di Cultura, di por contribui y presencia e ponemento di seyo di monumento priva riba e Kapel di Alto Vista. Pa asina e Kapel ta bira e prome edificio monumental priva y religioso cu lo ricibi e seyo aki. E seyo ta fungi como un simbolo di identificacion pa henter comunidad cu e monumento concerni ta inscribi den e registro di monumento y e monumento ta keda proteha segun ley. Pais Aruba tin 37 edificionan monumental ta proteha pa ley caba y cu Kapel ta bira 38.
Segun e mandatario tin hopi mas trabao pa hasi pa e siguiente añanan, pa sigui informa e balor cu e monumentonan tin pa henter e pueblo Arubano pero principalmente inculca e amor pa nos herencia cultural den nos hobennan.
