Contestando mas di 130 pregunta brindando amplio informacion
Diabierna ultimo reunionnan a continua pa e di tres dia consecutivo pa cu tratamento di presupesto 2022 den sala di Parlamento di Aruba. Un dia largo unda a toca turno na Ministerio di Enseñansa y Deporte cu ta resorta bou Minister Endy Croes como tambe Ministerio di Asuntonan Economico, Comunicacion y Desaroyo Sostenibel cu ta cay bou encargo di Minister Geoffrey Wever. E reunion a cuminsa den oranan tempran di mainta y a finalisa den carerda di 1’ or y 15 minuut di marduga.
Mester remarca cu e tabata reunion publico riba nivel unda cu ambos Mandatario a duna un excelente contestacion y presentacion di nan maneho y presupuesto 2022 di nan respectivo careteranan. E Mandatarionan a contesta tur pregunta y inkietud di e miembronan di Parlamento y ta di remarca cu ambos Minister Croes y Minister Wever a ricibi elogio di miembronan di Parlamento pa nan forma di comparti informacion cu Parlamento di Aruba.
Den e reunion di presupuesto Minister Endy Croes a ricibi mas di 130 pregunta unda cu loke a restalta den e disertacionnan tabata entre otro e problematica di werksters y SKOA. E Mandatario di Enseñansa a duna un amplio splicacion y amplia cu ta buskando un solucion pa cu e problematica aki. Minister Endy Croes duna un primicia durante e reunion aki felicitando pueblo di Noord cu Sint Aloysius School na Noord ta wordo renoba e aña aki.
