Minister di Husticia di Aruba, mr. drs. Arthur Dowers, durante su bishita oficial na Hulanda, a tene un reunion constructivo cu su homologo di Hulanda, Minister di Husticia David van Weel. E encuentro ta parti di e esfuersonan continuo di Gabinete AVP-Futuro pa fortifica cooperacion y sosten entre Aruba y Hulanda den e area crucial di husticia y siguridad.
Durante e reunion, a subraya e importancia di un cooperacion solido y bon estableci entre Aruba y Hulanda, un relacion cu ta basa riba respet mutuo y compromiso pa enfrenta desafionan comun riba tereno di ley y orden publico.
Minister van Weel a elogia e decision y esfuerso di Minister Dowers, cu den un corto tempo despues di su nombramento, a pone prioridad riba e laso institucional entre Aruba y Hulanda.
Temanan importante cu a trata durante e dialogo ta inclui:
Crimen cibernetico (cybercrime), un menasa creciente cu ta pidi un enfoke coordina y actualisa.
Problemanan relaciona cu droga, cu impacto tanto den siguridad regional como interno.
Intercambio structural di informacion valioso, pa fortalece investigacion y maneho di casonan di delincuencia.
Falta di personal den Landsrecherche, un punto di preocupacion cu ta pidi atencion urgente.
E rol y input di RST (Recherche Samenwerkingsteam) como un pilar esencial den lucha contra crimen organisa.
Minister Dowers a enfatisa cu e cooperacion continuo cu Hulanda ta di suma importancia pa fortalece e capacidad institucional di Aruba, y cu e ta compromete pa sigui busca solucion conhunto pa e desafionan cu nos ta enfrenta.
E reunion ta un paso mas den e rumbo pa fortifica e laso regional y pa garantisa un sistema di husticia mas eficiente, confiabel y resistente contra menasanan den e mundo moderno aki.