Diaranson mainta, Minister di Husticia mr. drs. Arthur Dowers, a haci un bishita no anuncia na Warda di Polis na San Nicolas na unda e chef van dienst, onderinspecteur Lloyd Wever, a duna e mandatario un recorido den e facilidadnan di KPA San Nicolas.
Cada bishita cu e Minister haci, ta pa haya un impresion di e departamento y condicion real den cual e empleadonan publico mester eherce nan trabao diariamente. Minister di husticia a indica cu tin hopi reto pa atende cu ne na diferente departamento, entre otro Instituto Coreccional Aruba na unda gran parti di e edificio no ta optimal. Minister a ricibi conseho pa basha gran parti di e facilidad coreccional abao, pero no ta comparti e pensamento ey y ta mira mas den direccion di un renobacion riguroso, sino e edificio mes lo cay den otro.
Na e warda di Polis na San Nicolas, e situacion di e edicifio ta parcialmente den bon estado, aunke tin varios problema cu lekmento. E parti patras di e warda di Polis si ta den deterioro total. E compleho di hospedahe parti patras den e cura ta den pio estado cu cualkier cas di adicto. Ademas e cantidad di autonan confisca ta creando situacionnan no higienico pa esnan trahando eynan.
Contrario na e Warda di San Nicolas, e Warda di Playa ta nobo y bon manteni caminda a pone atencion riba e diferente aspecto na beneficio di e agentenan, y Minister Dowers ta di opinion cu lo mester incorpora esakinan den tur otro edificio.
Segun Minister Dowers, e surplus cu e gobierno anterior tabata gaba cu ne, tabata surplus di decadencia, deterioro, debe, falta di mantencion y inversion den capacitacion y tur esakinan, e gobierno aki tin cu bay atende cu ne. Segun Minister Dowers, esaki no ta nada nobo pa e gabinete anterior, esaki ta hustamente nan manera di crea fondo, door di para tur inversion y crea un decadencia den e aparato publico, pa despues e gobierno di e asignatura aki mester haci inversion cuantioso pa purba drecha mas tanto posibel pa nan no bay perdi
Minister Dowers ta sigura cu lo continua cu su bishitanan di sorpresa na e departamentonan cu ta resorta bao di su ministerio pa por inventarisa tur cos y traha un plan di maneho mas pronto posibel.