Den contexto di e Justitieel Vierlanden Overleg (JVO) cu ta tumando luga e siman aki na Aruba, Minister di Husticia di Sint Maarten, mr. Nathalie Tackling, a haci un bishita di introduccion y trabao na su colega Arubano, mr. drs. Arthur Dowers.
Durante e reunion di introduccion, Minister Tackling a expresa su profundo agradecimento na Minister Dowers y Gobierno di Aruba pa nan sosten inmediato y incondicional durante e disturbio reciente den Prizon di Pointe Blanche na Sint Maarten. Aruba a hunga un rol clave den e momento dificil aki, mandando cinco agente di Guarda Nos Costa, ademas di e diesseis Mariniers Hulandes staciona na Aruba cu tambe a mobilisa pa yuda.
Minister Dowers a subraya e compromiso firme di Aruba pa cooperacion regional, y a expresa cu apesar di reto propio cu Aruba ta confronta, extende yudansa na nos islanan ruman ta un obligacion moral y politico.
Durante e reunion bilateral, a trata e siguiente puntonan importante:
E presencia di arma di candela entre hende hoben, un preocupacion creciente den Caribe Hulandes, aunkue cu un diferente nivel di urgencia pa cada isla.
Prevencion di criminalidad y reforma di husticia penal, cu lo discuti mas profundo durante e sesion formal di JVO.
E disminucion gradual di cooperacion interinsular den añanan recien, algo cu ambos Minister ta desea pa reenforsa via un renobacion di compromiso strategico.
E intercambio di bon practica y experencia institucional, cu Minister Tackling ta busca pa beneficia di e amplio conocemento di Minister Dowers, acumula durante su ocho añanan como Minister di Husticia.
Ademas, e Minsternan a tene un intercambio constructivo tocante e plannan actual pa construccion di facilidadnan coreccional nobo tanto na Aruba como na Sint Maarten. Minister Tackling a duna un actualisacion di e proceso mas avansa na banda di Sint Maarten y a ofrece informacion relevante pa yuda Aruba den su fase di planificacion.
E bishita aki ta reafrma e reconocemento mutuo cu pa logra un sistema di husticia fuerte y eficaz den Reino, ta necesario un cooperacion interinsular robusto, dialogo continuo, y un bista unifica riba siguridad y estado di derecho den Caribe Hulandes.
