Diabierna mainta, Minister di Enseñansa y Deporte Endy Croes a atende presentacion di leerorkest 2022-2023 di scol basico Colegio Laura Wernet Paskel na Santa Cruz. Un bunita presentacion di e muchanan di aña 2 te cu 6. A traves di les online di e proyecto di Leerorkest Aruba, e muchanan di aña 2 a haya les di formacion general di musica, unda nan a siña e.o. diferente cantica. Pa loke ta trata e alumnonan di aña 3 te cu 6 a haya les di instrumento. Pues, diabierna, dia 23 di juni, den presencia di docente y mayornan e muchanan a duna un bunita presentacion pa culmina Leerorkest Aruba di aña escolar 2022-2023. Minister Endy Croes a felicita e alumnonan di Colegio Laura Wernet Paskel pa nan bunita presentacion y cabesante di scol Juffrouw Bernadetta “Eta” Geerman-Figaroa y henter e ekipo di Colegio Laura Wernet Paskel cu a contribui den e gran evento musical aki. Alabes, Minister Endy Croes ta aplaudi e ekipo di Leerorkest Aruba cu a haci e proyecto aki posibel.
Comunicado Minister di Enseñansa y Deporte Endy Croes
