Ta bay traha pa introduci esaki na tur scol di Aruba
Diasabra atardi a lansa e campañia di prevencion contra abuso di mucha ‘Mi mes un heroe’. Entre e invitadonan por a conta cu presencia di su Excelencia Gobernador di Aruba, sr. Alfonso Boekhoudt, Presidente di Parlamento sr. Edgard, Vrolijk, Prome Minister di Aruba sra. Evelyn Wever – Croes, Minister Rocco Tjon, Parlamentarionan di Coalicion y demas invitadonan special.
Durante e ocasion special aki Minister Endy Croes a hiba palabra unda e expresa cu na momento cu colega Minister Rocco Tjon a acerca cu e proyecto aki y despues di a ricibi e presentacion di sra. Edselyn Figaroa y sra.Liza Helder mas cu claro e proyecto aki ta fit completamente den e vison di Gabinete Wever- Croes 2. Unda e tema di abuso di mucha tin un prioridad hopi halto y na mes momento a acerca Prome Minister di Aruba sra. Evelyn – Wever -Croes pa forma e ekipo. Minister Endy Croes a sigui bisa cu den colaboracion pa busca e fondonan necesario pa pone accion tras di nos palabra y promesa. Minister Endy Croes a enfatisa cu nos ta kere hopi den e proyecto aki. Hopi a wordo haci pero e parti preventivo y duna e muchanan e herment necesario tabata falta. Despues di hopi aña di preparacion di Edselyn nos a logra cu awe nos ta lansa e bunita proyecto aki. E mandatario a sigui bisa na diferente ocasion y den diferente discurso e ta papia di e competencianan di siglo 21 y ta menciona hopi biaha e cuater letter C. Minister Endy Croes a elabora riba e tres letter C nan aki a forma e parti esencial pa por a logra e proyecto aki. E prome ta e comunicacion entre e Ministerionan. E di dos tabata e creatividad di ful e ekipo, tanto den e ekipo di Edselyn y Ministerio di Husticia y Asuntonan Social y tur esnan cu a carga e proyecto aki. Pero sigur importante ta e C di colaboracion saliendo for di e pandemia mester tine e creatividad y e colaboracion entre Ministerio cu ta sostene e proyecto aki. Esey ta duna nos e trankilidad y felicidad pa traha den un ekipo, primordialmente pa e muchanan, nan merece di ta feliz, nan merece di wordo protegi, nan merece di cariño y amor. Tipo di proyectonan aki nos ta creando e brug pa logra tur e aspecto nan aki den e parti preventivo brindandonan e herment nan necesario. Como Minister di Enseñansa y Deporte ta mi tarea sigur pa introduci esaki tambe den tur scol na Aruba y na e miho contribucion posibel pa por logra e efectividad necesario pa proteha nos muchanan y pa nan por ta feliz
Finalisando Minister Endy Croes ta felicita Edselyn Figaroa, Ministerio di Husticia y Asuntonan Social y tur esnan cu a yuda haci e proyecto aki un realidad.
