Su amor pa Aruba a transcede tempo y ta e forza invisibel pa surpasa tur reto
E siman aki riba 25 di januari nos ta conmemora e fecha natalicio di Betico Croes, e lider stima di nos Pais cu a sa di uni nos Pueblo na bienestar di Aruba.
Na bida Betico lo a cumpli 86 aña, pero Dios a dicidi diferente y na edad di 48 aña Betico a bay sosega pa semper. Sinembargo Betico su esfuersonan, logronan y su amor incondicional pa Aruba ta asina grandi, cu awe 38 aña despues di su fayecimento, ainda Betico ta bibo den e memoria y curason di nos Pueblo. Esaki ta demostra cu Betico Croes ta e lider stima pa su Pueblo.
Betico su amor pa Aruba te dia di awe ta inspira, pa e manera cu ela unifica e Pueblo di Aruba pa logra cosnan grandi pa nos Pais. Na cabes di un Pueblo uni, Betico a logra Aruba su Status Aparte cu a duna nos e herment pa desaroya como Pueblo y Pais, segun nos propio compas pa dicidi nos propio destino. Na caminda pa logra nos Status Aparte, Betico a mustra nos riba e importancia pa defende nos diginidad y nos identidad, y pa obra semper cu amor pa nos prohimo y nos Pais. Ta e amor cu Betico a demostra den su obranan pa Aruba, ta locual a transcede e barera di tempo y awe ta e forza invisibel cu ta yuda e Pueblo di Aruba pa surpasa tur reto.
Nos ta eternamente gradici na tur locual Betico a significa pa Aruba. Betico ta e lider stima pa su Pueblo. Ban siña nos yuinan kende tabata Betico Croes. Ban splica nan di e legado cu ela laga pa nos, y mustra nan riba e forza cu union y amor ta trece pa e Pueblo di Aruba. Feliz Dia di Betico.