Como Minister encarga cu Cultura, Minister Maduro ta responsabel pa e ‘Erediensten’ di nos Pais. Den cuadro di e trabounan relaciona cu ‘Erediensten,’ Minister Maduro a cera conoci cu Rabbi Baruch Zeilicovich di Beth Israel Synagogue, kende ta e guia spiritual nobo pa e comunidad Hudiu na Aruba. Rabbi Baruch ta sucesor di Rabbi Daniel Kripper kende tabata den funcion desde 2013 te cu 2022. Rabbi Baruch no ta desconoci, ya cu e Rabbi tin 32 aña ta bin Aruba como turista. Na varios ocasion Rabbi Baruch a yuda cu ceremonia di bar mitzvah y casamento na Aruba. Minister Maduro a hiba un combersacion ameno cu Rabbi Baruch riba e importancia pa un persona por conta cu guia spiritual. Sigur na momento di pandemia y tragedia, guia spiritual ta brinda consuelo y ta crea conocemento pa por sigui enfrenta e retonan di tur dia. E mandatario ta desea Rabbi Baruch hopi exito cu e trabou noble di guia e comunidad Hudiu na Aruba.
Minister Maduro a reuni cu Rabbi Baruch Zeilicovich di Beth Israel Synagogue
