Ta laga e sistema traha un par di luna pa asina por duna un miho bista di e entrada genera
E siman aki Minister Maduro di Finansa a reuni hunto cu e ekipo di DIMP, Aduana y Departamento di Legislacion pa asina repasa e prome luna di BBO na Frontera. E sistema fiscal nobo aki a keda introduci dia 1 di augustus 2023 y dia 15 di september 2023 tabata e prome biaha cu DIMP a ricibi declaracionnan di BBO, BAZV y BAVP cu ta inclui e cambio fiscal reciente. Mester bisa cu tur cos ta mustra cu e introduccion di BBO na Frontera tabata tecnicamente exitoso. Mester laga e sistema traha un par di luna pa asina por tin un miho bista di e entrada genera pa e sistema fiscal nobo aki pa nos Pais.
Tecnicamente exitoso
Pa haci e cobransa di BBO na Frontera posibel, a acopla e sistema automatisa di DIMP na esun di Aduana. Mester bisa cu di banda di Aduana den e sistema automatisa di SAP y di banda di DIMP den e sistema automatisa di Asycuda, tur cambio tecnico pa introduci e cobransa di BBO, BAZV y BAVP na frontera, tabata exitoso. E informacion brinda na e ‘brokers’ y na e otro ‘stakeholders’ durante e diferente sesion di informacion a brinda nan fruto y a haci cu e yenamento di e informacion necesario ora di haci importacion a bay sin mucho problema. Banda di esaki e cambionan den sistema di SAP pa asina por a haci e cobransa di BBO mensual kitando locual ya caba a wordo paga na frontera, tambe tabata exitoso. E restitucion di esnan cu a paga mas BBO na frontera cu locual mester a paga mensualmente tambe a bay bon. Por informa cu 33 compania a haya nan restitucion den menos di 4 siman di tempo. Di esnan cu mester a haya restitucion y cu tabata tin debe di impuesto, a tuma luga un ‘verekening’ cu tambe tabata exitoso. Di e manera aki e cumplimento cu impuesto na nos Pais tambe ta mehora door di e cambio fiscal aki.
Ta tuma un par di luna pa duna un miho bista
Pa locual ta e entrada cu a genera extra na BBO, por informa cu esaki ta den liña cu locual a wordo presupuesta. Pa awo ta laga e sistema traha un par di luna pa asina por duna un miho bista di e entrada genera. Un presentacion na publico riba e resultado lo wordo duna mas despues ora tin cifra compila di mas luna cu e sistema nobo ta den efecto.