Ta trahando pa presupuesto 2023 keda entrega na tempo na Parlamento
Conforme planificacion, e presupuesto preliminar di Pais Aruba pa aña 2023 a bay dia 9 di juni pa CAFT pa asina e organo di supervision financiero por duna su opinion. Den e siman di 20-24 juni CAFT lo por saca nan conseho y Gobierno lo tin cu prepara e reaccion riba esaki cu lo wordo inclui den e Memoria di Splicacion cu lo bay compaña e concepto di Ley di Presupuesto 2023. Si tur cos bay manera planifica, Departamento Huridico lo por ricibi e concepto di presupuesto den e siman di 27 di juni pa 1 di juli. Despues Departamento Huridico hunto cu Conseho di Minister lo por presenta e concepto no mas tarda cu dia 4 di juli na Raad van Advies pa Gobierno por haya nan conseho. Di e Colegio Halto di conseho aki, nos lo por spera un conseho na fin di juli of na comienso di augustus.
Asina cu Raad van Advies keda cla cu nan conseho riba Presupuesto 2023, Gobierno ta haci e cambionan necesario y ta brinda e concepto di Presupuesto na Parlamento. Tur esfuerso ta wordo haci pa asina na fin di augustus, Minister di Finansa por entrega e concepto di Presupuesto 2023 na Parlamento di Aruba. Si tur cos cana bon, e debate den Parlamento lo por tuma lugar den e ultimo 3 luna di aña 2022 y e Presupuesto 2023 lo por keda aproba fin di december 2022. Despues cu Gobernador firma e Presupuesto 2023, esaki ta bay pa keda publica den Landscourant pa por drenta na vigor na comienso di aña 2023.
