Despues di e exitoso programa informativo ‘Haci nos Herencia Cultural accesibel,’ Minister Xiomara Maduro di Cultura ta presenta e di dos parti di e programa den cual ta duna un bista di e trabounan cu ta wordo haci na nos Pais pa conserva nos herencia cultural.
Durante di e di dos parti di e programa ‘Haci nos Herencia Cultural accesibel,’ representantenan di varios instancia/organisacion lo splica en breve e importancia y balor di e plataforma digital den nan trabou. Alabes sr. Peter Scholing di Biblioteca Nacional Aruba y sr. Edric Croes di Archivo Nacional Aruba ta brinda informacion valioso tocante e proyecto innovativo cu ta hiba e nomber Coleccion Aruba.
E plataforma digital Coleccion Aruba ta un proyecto innovativo cu un balor significativo pa Aruba su herencia cultural. E portal digital aki ta e punto central pa por haya documento, buki, potret, materialnan audiovisual, corant, revista y archivo colonial di Aruba. Temporalmente e plataforma digital ta accesibel via https://coleccionaruba.bna.aw.
Ta importante pa nos conserva Aruba su herencia cultural na bienestar di e generacionnan cu ta sigui nos. E digitalisacion di nos patrimonio cultural ta un hunga un papel clave den e proteccion, conservacion, investigacion, restauracion, difusion y promocion di nos herencia cultural. Pa e motibo aki e esfuersonan haci na Aruba pa preserva nos herencia mester wordo mustra y mester por conta cu e apoyo di nos tur.
Minister Maduro di Cultura ta haci un invitacion special pa sintonisa e programa informativo ‘Haci nos Herencia Cultural accesibel’ na TeleAruba dialuna, dia 21 di november pa 7’or di anochi y diamars, dia 22 di november na DiarioTV pa 8’or di anochi.