Ministerio di ESKD ta duna honor na nos baluarte Rina Penso

Ministerio di Enseñansa, Ciencia, Cultura i Deporte (ESKD) ta stimula pueblo di Corsou pa ban sigui traha riba un cultura di bienestar dor di sigui “Konop’é, Als’é y Traspas’é”. Esaki ta nifica pa hunto nos ban haci uzo di tur locual tin na sabiduria di nos grandi nan tocante di bienestar. Consecuentemente, Minister di Enseñansa, Ciencia, Cultura y Deporte sr. Sithree ‘Cey’ van Heydoorn – na nomber di Gobierno di Corsou ta duna homenahe na un gran baluarte, actriz y cantante; un eminencia cultural cu ta sra. Rina M.E. Penso.
Minister Van Heydoorn a bay bishita sra. Penso na su cas y a informe cu ta e intencion pa dedica e periodo di 18 te cu 26 di october 2021 na su persona.

Durante di e periodo aki lo bay tin diferente actividad y informacion na scolnan, den media y den bario, pa principalmente nos hobennan cera conoci cu sra. Rina Penso y su actividadnan den e mundo di teatro. Lo clausura e periodo cu un gran homenahe na sra. Penso riba 26 di october, cual ta e dia cu ta celebra su cumpleaño. Dia 22 di october ultimo, Minister van Heydoorn a duna un ‘Award’ di reconocemento na sra. Penso, nos baluarte, pa tur su obranan artistico cultural cu a keda presenta for di aña 1960. Esaki a sosode den The Movies na Otrabanda caminda a presenta e obra “La Dama Blanca” cu a gana premio internacional di filmacion di Caribe durante Festival ‘Tales.