National Employment Services Center (NESC), un departamento den cuadro di Ministerio di Salubridad Publico, Desaroyo Social y Labor (VSA), a intensifica e preparacionnan pa e di Tres Feria Nacional di Trabou, calcula pa tuma luga diahuebs 24 di september 2026, di 11:00 a.m. te cu 6:00 p.m. Prome cu e evento principal, e companianan participante y personanan cu ta busca trabou lo wordo invita tambe pa un Evento Exclusivo di Network pa Negoshi, cual lo tuma luga diamars 22 di september 2026 na National Institute for Professional Advancement (NIPA).
Como parti di e preparacionnan, e Oficialnan di Servicio pa Negoshi di NESC lo realisa bishitanan y asercamentonan special na companianan den diferente sector pa asina fomenta participacion den e Feria Nacional di Trabou y yuda e empleadornan completa y finalisa tur aspecto di e proceso di registracion. Via di e contacto directo aki, NESC tin como meta pa sigura cu e companianan ta ricibi full e apoyo necesario y cu nan por saca e maximo beneficio for di e oportunidadnan cu e evento aki ta ofrece.
Segun cu Sint Maarten ta sigui experencia un crecementu economico positivo y un expansion di oportunidadnan den industrianan clave, inverti den e forsa laboral local ta keda algo esencial pa sostene e ritmo ey. Maske e panorama economico di e pais ta keda uno animante, desempleo bou di hobennan ta sigui presenta un reto significante, unda hopi adulto moho ta enfrenta dificultadnan pa drenta e mercado laboral y adkeri experencia laboral valioso. Den e contexto aki, e di tres Feria Nacional di Trabou ta sirbi como hopi mas cu simplemente un evento di recrutacion; e ta representa un inversion nacional den hende, den aliansa y den prosperidad. Door di uni empleadornan, personanan cu ta busca trabou, institucionnan educativo y inversionistanan clave, e iniciativa aki ta busca pa fortalece e participacion laboral, mehora e empleabilidad y sigura cu e beneficionan di e crecementu economico ta wordo comparti mas ampliamente den henter e comunidad.
NESC tin e honor di conta cu e apoyo di e Honorabel Prome Minister di Sint Maarten / Minister Interino di Salubridad Publico, Desaroyo Social y Labor, Dr. Luc Mercelina, kende recientemente a firma e acuerdo di participacion pa e proximo evento den presencia di e team di Servicio pa Negoshi. Su respaldo ta resalta e importancia nacional di e iniciativa aki y ta refaha e compromiso continuo di Gobierno pa fortalece e oportunidadnan di empleo y promove un crecementu economico inclusivo.
Minister Interino di Salubridad Publico, Desaroyo Social y Labor (VSA) y Honorabel Prome Minister, Dr. Luc Mercelina, a declara: “Un economia fuerte mester crea oportunidad pa tur hende. Segun nos pais ta sigui crece, nos mester sigura cu nos hendenan—especialmente nos hobennan—ta capacita pa participa, contribui y triunfa. E di Tres Feria Nacional di Trabou ta refleha e compromiso di Gobierno pa conecta talento cu oportunidad, fortalece aliansanan cu e sector priva, y construi un forsa laboral cu ta resiliente, competitivo y prepara pa futuro. Cada trabou crea ta fortalece un famia, cada oportunidad ta transforma un bida, y cada aliansa cu nos ta construi awe ta contribui na un Sint Maarten mas fuerte mañan. Mi ta curasha cada empleador pa inverti den talento local y cada persona cu ta busca trabou pa brasa e oportunidad aki cu confiansa, determinacion y speransa.”
Basa riba e exito di edicionnan anterior, e proximo Feria Nacional di Trabou lo bolbe brinda un plataforma pa empleadornan conecta cu talento local, mientrastanto fomentando un colaboracion mas fuerte entre sector publico y priva. Ademas di e oportunidadnan di recrutacion y network pa negoshi, e edicion di 2026 lo presenta un paso importante dilanti den e modernisacion di servicionan di empleo. NESC lo lansa oficialmente e prome Portal Nacional di Trabou, un plataforma digital innovativo diseña pa mehora e conexionnan entre empleadornan y esnan cu ta busca trabou. E portal aki lo provee companianan cu un herment moderno pa anuncia vacancianan y haya acceso na talento local, brindando na mes momento un mayor acceso na oportunidadnan di empleo y recursonan di carera pa e personanan cu ta busca trabou. Introduccion di e plataforma aki ta refleha e compromiso continuo di NESC cu innovacion y cu e construccion di un mercado laboral cu ta responde na e necesidadnan cambiante di un economia den crecementu.
E Feria Nacional di Trabou ta sigui construi tambe riba e fundeshi solido estableci via e edicionnan exitoso cu a tuma luga na 2023 y 2024. NESC ta reconoce e esfuerso destaca y e dedicacion di su Oficialnan di Servicio pa Negoshi, Sr. Maquidu Frevry y Sr. Lynroy Rey, kendenan su compromiso continuo cu e comunidad empresarial y nan dedicion pa fomenta aliansanan publico-priva tabata fundamental pa e crecementu y exito di e Feria Nacional di Trabou. Nan esfuersonan a yuda establece e evento aki como uno di e initiativanan principal di desaroyo laboral na Sint Maarten y a fortalece e relacion entre empleadornan y National Employment Services Center.
Manteniento e vision di NESC pa servicionan di empleo moderno y accesibel, e desaroyo y implementacion di e Portal Nacional di Trabou a wordo sostene pa e trabou y contribucionnan tecnico di Sr. Edy Esnat, kende su esfuersonan a yuda pa realisa e importante iniciativa aki como parti di e agenda mas amplio di modernisacion di NESC. Segun NESC, e iniciativanan aki ta resalta e importancia di inverti no solamente den e forsa laboral di e nacion, sino tambe den e empleadonan publico dedica cu ta traha incansablemente detras di esclena pa conecta talento cu oportunidad y apoya e crecementu sostenibel di e economia di Sint Maarten.
NESC ta curasha companianan, organisacionnan y lidernan di industria pa mira nan participacion no solamente como un oportunidad pa recruta candidatonan cualifica, sino tambe como un inversion estrategico den e futuro di Sint Maarten. Door di crea oportunidadnan di empleo, pasantianan (internships), siñansa den practica (apprenticeships) y rutanan di carera pa talento local, companianan ta hunga un papel vital den reduccion di desempleo, empoderamento di hubentud, y den sigura cu e crecementu economico di e pais ta traduci den un prosperidad comparti pa tur hende. Empleadornan interesa en participa ta wordo curasha pa registra trempan y probecha di e apoyo cu e Oficialnan di Servicio pa Negoshi di NESC ta brindando. Via colaboracion, innovacion y un compromiso comparti pa desaroya talento local, Sint Maarten por sigui construi un forsa laboral mas inclusivo, competitivo y prepara pa futuro.