Den edificio di Educampus, unda anteriormente tabata situa Bon Bini Bazaar, a tuma luga e lansamento oficial di NGO Academy Aruba, un proyecto nobo cu ta resulta di un colaboracion entre CEDE Aruba y Universidad di Aruba.
E iniciativa tin como meta principal pa fortalece organisacionnan di sociedad civil na Aruba door di entrenamento y capacitacion dirigi na miembronan di directiva y esnan cu ta maneha e organisacionnan den practica diario.
Necesidad pa organisacionnan mas fuerte
Segun director di CEDE Aruba, Daniel Techklenborg, den e ultimo añanan CEDE hunto cu otro organisacionnan a logra atrae mas financiamento pa proyecto local y interinsular, incluyendo colaboracion entre Aruba, Corsou y St. Maarten. Sinembargo, pa logra mas oportunidad y amplia e impacto, ta necesario cu organisacionnan local ta solido den su structuranan interno.
Aruba tin un grupo grandi di fundacionnan y organisacionnan cu ta traha pa bienestar di comunidad. Algun ta opera completamente riba base boluntario, mientras cu otro ta depende parcialmente of completamente di subsidio di Gobierno di Aruba.
Techklenborg ta enfatisa cu ora un organisacion ta traha cu fondo sea subsidio of donacion tin obligacion pa cumpli cu criterio specifico. Gobierno y otro subsidionan ta exigi cada vez mas transparencia, bon gobernansa y profesionalisacion.
Enfoke riba gobernansa y sostenibilidad
E programacion di NGO Academy lo enfoca riba diferente topico relevante, incluyendo:
- Good governance
- Con pa skirbi y formula proyectonan di calidad pa logra financiamento
- Maneho di finansas
- Recurso humano (HR)
- Transferencia di conocemento pa siguiente generacion
- Uzo di AI y innovacion den gestion
E entrenamentonan lo tuma luga na edificio di Educampus y lo ofrece curso, tayer y encuentro dirigi na directivanan di fundacionnan y organisacionnan na Aruba.
Respuesta positivo for di sector
Durante e lansamento oficial, varios organisacionnan a mustra interes y a presenta nan mes pa participa den e programa. Segun CEDE Aruba, esaki ta confirma e necesidad real cu tin den sector pa capacitacion structural.
Un realidad cu organisacionnan ta enfrenta ta cu problemanan social na Aruba no ta bira menos, pero al contrario ta bira mas compleho. Na mes momento, e compensacion pa financiamento ta un reto global cu ta afecta tambe sector sin fin di lucro.
CEDE Aruba ta sigui desempeña un rol importante den atrae oportunidad di fondo pa sector civil. Cu e creacion di NGO Academy, e organisacion ta duna un paso concreto pa asina prepara fundacionnan y ONG nan pa por posiciona nan mes mas fuerte, mas profesional y mas sostenibel pa futuro.
E prome lesnan lo cuminsa otro siman, cu “good governance” como prome modulo den e trayecto di fortalecemento organisacionnan.