Nashonnan Uní a proklamá 21 di mart komo Dia Internashonal di Mondi. E aña akí e tema ta ‘Mondi i salubridat’. Mondi ta kontribuí hopi na salubridat. Nan ta purifiká awa, purifiká aire, nan ta saka karbon for di aire pa kombatí kambio di klima i mehorá nos bienestar. Fuera di esei palu ta duna sombra i nan tin un influensia positivo riba klima lokal. Ta na nos pa protehé e rekursonan natural akí.
E lemanan “It’s in our nature”(TCB i “Nos ta biba di naturalesa” ta bisa hopi di identidat di nos isla.
Boneiru tin mondi tropikal seku i mondi di palu di mangel. Sientífikonan ta husga futuro di nos mondinan tropikal seku komo masha desfaborabel. Esaki ta okashoná pa urbanisashon ku ta oumentando debí na kresementu di poblashon i di turismo. Kabritu, buriku i porko ku ta kome yerba tambe ta hunga un ròl importante.
Afortunadamente ta tuma medida pa kombatí deterioro. Un lugá lokal pa kultivo di palu, Tera Barra, ta kultivá pa e motibu ei míles di mata di Boneiru mes ku nan lo por planta despues na e isla. Na Washington-Slagbaai National Park, STINAPA tin un programa pa saka komedó di yerba afó.
Mondi di palu di mangel ta importante den e lucha kontra kambio di klima komo ku nan ta saka relativamente hopi CO2 for di aire i ta protehé pais kontra tormenta tropikal.
Pero nos mondinan di palu di mangel tambe ta bou di preshon ku konstrukshon kresiente, polushon, i eroshon komo konsekuensia di kabritu golos pa yerba.
Stinapa i Mangrove Maniacs ta purba kombatí eroshon ku reforestashon. Nan ta mehorá sirkulashon di awa den mondi di palu di mangel ku hakmentu i kobamentu di kanal. Banda di kosta ta planta mondi di palu di mangel nobo pa protekshon di kosta.
Gobièrnu lokal i organisashonnan lokal ta bini ku e proyektonan i ta ehekutá nan. Reino ta paga pa ehekushon di e proyektonan. Mondi salú ta kontribuí na hende salú.