E ultimo 2 lunanan aki no tawata facil pa Aruba. Despues cu e second wave a cuminsa 4 augustus 2020 nos a mira cu pa varios siman casonan positivo tawata subi. Tawata tin 2 momento cu e casonan activo riba un solo dia a surpasa mas cu 160 caso.
Dia 14 september 2020 Aruba a registra 178 caso riba un solo dia. Nos a dicidi cu e situacion aki NO por continua y medidanan mas drastico mester wordo tuma. Cu curashi, determinacion y conviccion nos a tuma e accionan necesario pa proteha salud di nos hendenan.
Nos a tuma accion di inmediato y a haci hopi cambio pa reduci e cantidad di casonan positivo. Nos a pone como strategia pa reduci e cantidad di casonan positivo te na 30 caso positivo pa dia. Nos a introduci bek TDQ y a cambia e orario di cierre. Nos a reenforza nos departmento di salud publico. Nos a reenforza e team di bron- en contacten onderzoek. Nos a amplia e team cu ta controla esnan den isolacion y cuarantena y a introduci multa pa esnan cu NO ta cumpli. E taskforce bedrijven cu ta controlae negoshinan riba protocol y hygiena tambe a wordo amplia. Sin lubida pa menciona nos a amplia capacidad di personal na nos hospital cu 50 personal di AMI (compania cu gobierno Hulandes a contrata pa yuda Aruba) pa nos por atende y maneha e casonan di Covid-19 na nos hospital.
Tur esaki a wordo haci pa nos por reduci e cantidad di casonan positivo na 30 caso pa dia. Ta importante pa menciona cu nos mester realiza cu nos no ta bai yega na o caso positivo mas manteniendo frontera y economia habri.
Awe nos por ta un tiki optimista cu e cantidad di casonan positivo ta bahando y tambe e positivity rate tambe ta bahando.
Den luna di augustus nos a conose 1863 caso positivo nobo di Covid, di un total di 13547 test haci di cual “positivity rate” tawata varia entre 30% y 40% y a constata 7 morto. Den luna di september nos a conose 1845 caso nobo di Covid-19, di un total di 10108 test haci di cual “positivity rate” ta varia ente 20% y 35% y a constata 17 morto.
Actualmente e casonan activo a baha bao di 600 caso y nos ta na 571 caso activo. Apenas 2 siman pasa nos tawata na 1289 caso activo y awe nos a logra reduci esaki caba cu 50%. Nos ta keda cautelosamente optimista cu e trend aki lo continua. Mas liher nos keda baha e cantidad di casonan positivo, mas oportunidad pa nos turismo y economia.
P’esey ta asina importante pa nos sigui cuida y cumpli cu e medidanan di proteccion cu ya ta conoci pa comunidad completo. Sigui focus pa laba man continuamente, sigui mantene distanciamento social, sigui bisti masks y sigui e protocolnan.
Solamente cu determinacion, curashi y positivismo nos lo ta fuerte pa maneha y controla Covid -19. Ta nos mester control’e y no permiti nos wordo controla pa Covid. Esaki nos por haci solamente door di sigui cuida nos mes y otronan den comunidad.
Nos ta bahando e contagio y nos mester sigui cu discplinaMinister Dangui Oduber:
