Detencion pa maneha bao di influencia di alcohol Diabierna 19 di juni, alrededor di 2:50 or di marduga, a detene un dama di inicial J.E.D.D. di 21 aña di edad riba Kaya Amsterdam pa maneha bao di influencia di alcohol. A para e vehiculo di e sospechoso pasobra e tabata mustra un comportamento sospechoso di maneha y tabata falta un luz di patras. Durante e control a haci un test di supla cu ne y a resulta cu el a consumi mas alcohol cu ta permiti pa ley. A detene e sospechoso y a transporte pa warda di polis pa continua cu e tramitenan corespondiente. El a haña un prohibicion di maneha pa 4 ora y lo ricibi un proces-verbal tambe.
Auto na candela Diahuebs 18 di juni, alrededor di 9:15 or di anochi, e sala di control (meldkamer) a ricibi un notificacion tocante un auto na candela den cura di un cas na Tanki Matrimonio. Na yegada di polis y brandweer, a resulta cu e candela tabata concentra parti dilanti di e vehiculo, na altura di e bateria. Brandweer a baha e candela. No tabatin hende herida. Probablemente un corto circuito a causa e candela.
Peaton herida despues di incidente Diahuebs 18 di juni, alrededor di 9:00 or di anochi, a drenta un notificacion tocante un incidente riba Kaya Gilberto F. (Betico) Croes. A resulta cu un peaton a trapa riba un obheto di heru riba acera y a resulta herida. Mester a pidi asistencia di brandweer pa corta e obheto y libera e victima. Personal di ambulans a duna e victima asistencia medico y despues a transporte pa hospital pa un tratamento medico mas avansa.
Chauffeur di scooter herida Diahuebs 18 di juni, alrededor di 6:00 or di atardi, sala di control a ricibi un notificacion tocante un incidente riba Kaya Internacional. E chauffeur di un scooter a slep y a cai, y pa e motivo aki el a resulta herida. Ambulans a transporta e victima pa hospital pa tratamento medico. A haci un test di supla cu e victima y no tabatin indicacion di uzo di alcohol. Polis a dirigi trafico temporalmente na e sitio.
Varios detencion pa maltrato
Diahuebs 18 di juni: Alrededor di 6:10 or di atardi, a detene un homber di inicial R.L.F. di 26 aña di edad na Kaya Petra pa maltrato. E sospechoso a maltrata un dama.
Diaranson 17 di juni: Alrededor di 10:35 or di anochi, a detene un homber di inicial S.V. di 37 aña di edad na Bario Mexico pa maltrato. E sospechoso a maltrata un dama y a bai cu su telefon.
Diamars 16 di juni: Alrededor di 9:15 or di mainta, a detene un dama di inicial M.G.V.J. di 47 aña di edad na Kaya Linda pa maltrato severo. E sospechoso a maltrata un otro dama severamente.
Tur e casonan aki ta wordo investiga.
Control planea di trafico Den oranan di mainta di diahuebs 18 di juni, aspirantenan di polis hunto cu nan guiadornan di practica a duna un control planea di trafico riba Bulevar Julio A. Abraham. A para y controla diescinco (15) vehiculo y a duna dos boet. Ambos boet tabata pa maneha sin un reibeweis valido.
E controlnan di trafico lo continua!
Detencion despues di kiebro den negocio Diahuebs 18 di juni, alrededor di 3:15 or di marduga, sala di control a ricibi un notificacion tocante un kiebro den un compania di huur auto na Kaya Industria. Despues di un investigacion mas aleu, alrededor di 3:25 or di marduga a detene un sospechoso menor di edad, un mucha homber di inicial R.A.W. di 16 aña di edad riba Bulevar Julio A. Abraham. E sospechoso tabata cadra cu e descripcion duna durante e caso di kiebro menciona. Investigacion den e caso aki ta continua.
Detencion despues di persecucion Diaranson 17 di juni, alrededor di 9:00 or di anochi, un patruya a nota un brommer riba Hanchi Amboina caminda e coredo no tabatin un helm bisti. A bai su tras y a nota cu e brommer no tabatin luz cende y tampoco un plachi di nomber.
Pa motivo di e violacionnan menciona, e agentenan a dicidi di activa e luznan optico di e vehiculo policial (zwaailicht) y e sirena pa para e coredo pa un control. E coredo a nenga e seyal pa para y a sigui core. E patruya a core tras di e brommer den diferente cali y a duna e coredo orden varios biaha pa para. Finalmente e patruya a logra blokia e brommer.
E coredo no por a identifica su mes y ademas el a duna un nomber falso varios biaha. Alrededor di 9:10 or di anochi a detene e sospechoso, un mucha homber di inicial D.F.M.V. di 15 aña di edad, pa no duna oido na orden di polis. A confisca e brommer y ademas e lo ricibi un proces-verbal pa tur e infraccionnan comete.
Ladronicia di herment for di cura di cas Diamars 16 di juni, alrededor di 12:15 or di merdia, sala di control a ricibi un notificacion tocante dos persona, ambo bisti na preto y cu cara tapa, cu net a caba di bula sali for di un cura di cas na Kaya Venus na Belnem. Ambos persona tabatin caha di herment den man y a drenta mondi coriendo. Despues di investigacion mas aleu a resulta cu e sospechosonan a drenta e cura di cas y a bai cu cahanan di herment for di un cuarto cu no tabata cera na slot. Despues di un busqueda den mondi, a topa cu e cahanan di herment cu e sospechosonan a horta un rato prome.
