Ladronisia di baiskel
Djaluna 14 di aprel a drenta keho di ladronisia di un baiskel di hende hòmber koló shinishi di un marka deskonosí. E baiskel tabata stashoná sin lòk, patras di un mashin di lanta sèn riba tereno di un akomodashon turístiko na Bulevar Julio A. Abraham. Den oranan lat di anochi di djadumingu 13 di aprel, deskonosínan a bai ku e baiskel.
Djasabra 12 di aprel a drenta keho di ladronisia di un baiskel (Fatbike) di hür, koló pretu di un marka deskonosí, modèl V-8. E baiskel tabata stashoná na kadena dilanti di un kas na Kaya America i deskonosínan a bai kuné.
Djabièrnè 11 di aprel a drenta keho di ladronisia di un baiskel (Fatbike) di hür ‘Class 29’, koló pretu. E baiskel tabata stashoná riba un tereno será di un akomodashon na Punt Vierkant i deskonosínan a bai kuné.
Ta investigando e kasonan.
Persekushon ta terminá ku detenshon
Den oranan di anochi riba djadumingu 13 di aprel, alrededor di 10.50 or, un persekushon a tuma lugá i ku a terminá ku dos detenshon riba Kaya Purunchi. Motibu di esaki tabata ku shofùr di un vehíkulo tabata kore sin lus i a ignorá òrdu di polis pa para. Riba Kaya Patachi na altura di Kaya Purunchi, e patruya a logra blòkia e outo i oblig’é pa para. A pone e shofùr mesora na altura ku e ta detené. Pero na momentu ku e agente a purba bui’e, el a resistí i nenga di koperá. Durante un forsageo, e pasahero di e vehíkulo a tene e agente polisial i a rank’é ku forsa. Dor di esaki e shofùr a logra lòs i a kore bai na un kas algu mas leu den e kaya. Aki a bolbe surgi un forsageo entre e shofùr i e agente polisial, dor di kua e agente a hañ’é obligá di hasi uzo di su ‘pepperspray’. Den kurá di e kas, tres hòmber mas a bini den direkshon di e agentenan, di kua e di dos agente a hañ’é obligá di saka su arma reglamentario pa a lòs tiru di atvertensia den laira. Despues di esaki, un otro patruya a yega na e sitio komo refuerso. E agentenan a duna òrdu na e sospechoso pa stòp di resistí pa bui’e. E sospechoso a nenga i a bini ku komportashon agresivo den direkshon di e agentenan, dor di kua un di e agentenan atrobe mester a hasi uso di ‘pepperspray’. Despues di esaki a detené e hòmber di inisial J.J.M. di 24 aña di edat pa neglishá òrdu di polis pa para i pa resistí su detenshon. A detené e pasahero tambe, un dama di inisial C.Y.C.R. di 23 aña di edat pa insulto i pa stroba trabou di polis. A hiba e outo warda di polis.
Kuerpo Polisial Hulanda Karibense no ta tolerá niun tipo di violensia ferbal òf físiko kontra nos agentenan. Aparte di detenshon pa e delitonan kometé, e agentenan tin tur derecho pa entregá un keho kontra e sospechoso(nan) pa kualkier forma di maltrato ku nan ta eksperensiá tantu ku unifòrm òf sin unifòrm. Un komportashon trankil di un i tur durante kòntròl i na momentu di konstatá violashon, ta kondusí na un solushon pasífiko ku ta deseabel pa un i tur.
Ladronisia di skuter
Djasabra 12 di aprel a drenta keho di ladronisia di un skuter di hür, koló shinishi skur di e marka Kymco, modèl Agility ku plachi di number MF-1352. E skuter tabata stashoná ku un lòk di stür riba tereno di un kompleho di apartamentu na Kaya PN Antonio Neuman i deskonosínan a bai kuné. Ta investigando e kaso.
Detenshonnan pa manehá bou di influensia
Djadumingu 13 di aprel, alrededor di 2.30 or di mardugá, un patruya a para dos skuter riba Bulevar Julio A. Abraham pa motibu ku nan tabata kore den direkshon prohibí. Durante di e kòntròl a hasi un tèst di supla ku ámbos shofùr for di kua a resultá ku un di e shofùrnan a konsumí mas alkohòl ku ta permití. A detené e dama di inisial Y.J.L. di 19 aña di edat pa manehá bou di influensia di alkohòl i a bai warda di polis kuné pa un análisis di rosea. A konsekuensia di e resultado di esaki a konfiská su reibeweis.
Djasabra 12 di aprel, alrededor di 4.10 or di mardugá, a detené un hòmber di inisial M.K. di 24 aña di edat riba Bulevar Gobernador N. Debrot pa manehá bou di influensia di alkohòl. E sospechoso tabata manehá un skuter ku no tabatin plachi di number i e no tabatin un hèlm bistí tampoko. Na momentu di e kòntròl e no por a mustra un reibeweis i prueba di seguro bálido. Durante kombersashon, e agentenan a konstatá ku e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné di kua a resultá ku el a konsumí mas alkohòl ku ta permití. A detené e sospechoso i a hib’é warda di polis pa un análisis di rosea. Banda di esaki el a haña but pa e violashonnan menshoná.