“Aruba tin demasiado turismo,” ta un argumento cu ex minister y ex lider di fraccion di PPA, Otmar Oduber, a expresa di no ta di acuerdo cu ne. P’esey mes PPA ta bira e debate completamente: turismo a crece, pero Gobierno no a prepara caretera, transporte, naturaleza y infrastructura pa crece hunto cu ne.
Segun ex lider di PPA, Aruba ta buscando culpabel na e luga robes. Trafico ta pega. Noordkust ta bou presion. Infrastructura ta keda atras. Tin preocupacion tocante construccion y capacidad di pais. Pero pa Oduber, esey no ta automaticamente prueba di over-tourism. “Mi no ta kere cu nos tin over-tourism. Nos tin under-development.” E frase ta pone responsabilidad bek caminda, segun Oduber, e mester ta: na Gobierno.
“Nos tabata sa cu turismo ta crece”
Aruba su economia ta depende enormemente di turismo. Oduber a menciona durante conferencia cu alrededor di 92% di economia ta relaciona directa of indirectamente cu e sector.
Su punto no ta e cifra mes. Ta e consecuencia. Si Aruba sa pa decadanan cu turismo ta motor principal di economia, pakico infrastructura no a crece na e mesun ritmo?
Pakico no a transforma transporte publico? Pakico no a prepara e careteranan? Pakico proteccion di e areanan natural no a wordo combina cu ruta y control? Parce cu ta awo Gobierno a descubri, cu crecemento mester planificacion?
Gobierno no por cambia regla despues
Segun Oduber, Gobierno tabatin oportunidad desde aña pasa pa cambia e condicionnan si e kier un otro modelo di desaroyo: mas vivienda, otro densidad, otro tipo di construccion of mas restriccion. “Gobierno tabatin oportunidad pa bisa: nos kier cambia e condicionnan pa logra otro meta,” y ta netamente esey nan no a haci na tempo. Y awor e inversionistanan ta confronta cu incertidumbre, mientras Gobierno ta trata como si e problema ta e inversion mes.
“Mester admiti cu como Gobierno, bo no a carga bo responsabilidad pa haci e cambionan necesario.”
Trafico? Unda transporte publico ta?
Oduber su argumento ta bira particularmente fuerte ora a toca trafico. Si Gobierno realmente kier menos auto riba caminda, e solucion no ta solamente pone un stop na crecemento. Mester duna hende alternativa. Un transporte publico moderno y confiabel por permiti un empleado laga su auto na cas, bay trabou trankil, evita gasto di parking y reduci cantidad di vehiculo.
“Mi kier menos transporte individual y un mihor transporte publico.” Pa Oduber, esey ta desaroyo.
Naturaleza tampoco mester paga e prijs
Oduber tampoco ta argumenta pa construccion sin limite. Den su trayectoria como minister, precisamente el a sa di mustra lo contrario: proteccion di area natural, Marine Park, legislacion ambiental y regulacion.
E ROPV mes ta reconoce necesidad di limita impacto di vehiculo di motor den naturaleza, incluyendo posibilidad pa indica caminda y ruta y regula cantidad y orario di vehiculo.
“Pues solucion no mester ta desaroyo of naturaleza. Cu bon gobernacion y vision bo por regula y regla ambos”
ATA: turismo ta genera placa, pero pais no ta sintie
Y aki Oduber ta conecta su argumento cu algo hopi mas politico: placa di ATA.
Segun Oduber, si turismo ta genera decenas di miyones, e fondo ey mester ta reinverti den e producto cu ta genera e placa: infrastructura, seguridad, caretera, maneho di destino y naturaleza. Oduber ta cuestiona e direccion actual caminda, alrededor di Afl. 80 miyon por termina den caha di Gobierno, en bes di keda disponibel pa inversion relaciona cu turismo.
Su pregunta implicitamente ta devastador: Si turismo a genera tanto prosperidad, pakico infrastructura, cu mester sostene turismo, ta keda atras? Oduber no ta nengando cu Aruba tin limite. E ta bisa cu Gobierno tabatin obligacion di anticipa nan. “No por permiti crecemento durante decadanan, no construi transporte, no mantene infrastructura, no controla ruta, no actualisa regla na tempo y despues declara cu turismo ta e problema. No ta turismo a desaroya demasiado. Ta Aruba y gobierno no a desaroya suficiente pa carga e crecemento cu nos mes a crea,” Otmar Oduber a finalisa bisando.
