Durante e reunionnan di e Interparlementair Koninkrijksoverleg (IPKO) cu ta tumando lugar actualmente na Hulanda, un di e puntonan di agenda crucial cu a keda trata ta e presentacion di e grupo di experto (Deskundigengroep) cu ta analizando e ‘Deficit Democratico den Reino’. Pa Aruba, sr. Johan Sjiem Fat ta forma parti di e comision aki, hunto cu representantenan di Sint Maarten, Corsou y Hulanda.
Ora nos ta papia di “deficit democratico”, nos ta referi na e falta di un balansa husto den tumamento di decisionnan den Reino.
Hopi bes tin ley- y decisionnan cu Hulanda ta tuma cu tin un impacto directo riba nos islanan, pero sin cu nos tin e bos of e voto democratico pa dicidi of porpone cambionan.
E comision aki ta trahando netamente pa haya un solucion pa e falta di representacion husto aki, pa asina proteha e derechonan di nos pueblo.
E punto di agenda aki tin un peso grandi pa nos futuro y cu Papa Dios su poder nan consehonan lo por crea e balans di poder den Reino.
E tareanan y e mandato exacto di e grupo di experto aki a keda defini for di IPKO di juni 2024 na Den Haag.
Meta di e presentacion tabata pa duna e delegacionnan participando na IPKO un bista di e trabounan actual y con e grupo ta premira e lunanan binidero pa formalisa e raportahe final.
Parlamentario Drs. Shailiny Tromp-Lee a subraya e importancia di e proceso aki: “E deficit democratico den Reino ta un tema structural cu tin nos atencion continuo. E echo cu e grupo di experto ta trahando duro ta duna nos e speransa cu p oktober e aña aki (segun indica) nos lo tin un documento solido riba mesa.
Nos como Parlamento mester spera formalmente e raportahe aki pa asina, di un forma autonomo y responsabel, determina e siguiente pasonan y decisionnan cu lo mester tuma.
E hand-out y e documentonan di trabou cu e grupo di experto a presenta a keda oficialmente inclui como parti di e lista di palabracionnan di e IPKO aki. Cu esaki, e delegacionnan ta keda debidamente infoma pa ora cu e raportahe final wordo entrega, por actua cu determinacion na bienestar di e ciudadanonan di e paisnan respectivo.