Den un declaracion sumamente fuerte, e lider di fraccion di PPA, Eduard Pieters, a cuestiona e moralidad di e actual gobierno frente e crisis economico. Pieters a indica cu e gobernantenan “simberguensa y abusador”, argumentando cu nan ta “disfruta” di e debilidad di un pueblo cu ta keda ricibi aumento tras di aumento sin ningun tipo di pasonan concreto pa suavisa e dolor aki.
E “Conseho Gratis” di sector comercial
Pieters a trece dilanti un proposicion cu a wordo presenta publicamente pa e comerciante respeta, Sr. Saladin. Segun Pieters, esaki ta un “conseho gratuito” cu Gobierno mester implementa inmediatamente pa frena e inflacion:
- Eliminacion di BBO riba flete: Pa evita cu e aumento den costo di transporte internacional ta wordo transferi pa e prijs final, PPA ta propone pa no cobra BBO riba e parti ey.
- No cobra BBO riba invoerecht: Door di reduci e carga fiscal aki, e comerciante lo tin menos gasto extra pa “hinka back” den e prijs di e productonan.
- Instruccion na Aduana: Pieters ta enfatisa cu como poder ehecutivo, Gobierno tin e autoridad pa duna instruccion na Aduana pa stop di cobra e impuestonan aki riba e costonan di importacion.
Menasa di un recesion mundial
E lider di PPA Eduard Pieters a recorda cu tin un probabilidad di entre 30% pa 48% cu un recesion mundial por keda declara pronto. Cu e panorama aki, caminda e costo di bida ya caba ta un peso enorme, e falta di accion di parti di Minister di Finansa y Minister Presidente ta wordo cualifica como un iresponsabilidad total.
“Ami no por pensa riba un otro nomber pa boso; ora boso ta disfruta di e debilidad di un pueblo, boso ta abusadornan,” Pieters a declara, insistiendo cu Parlamento mester responsabilisa e ministernan pa e falta di un plan di mitigacion.