Durante e di dos tanda di e ultimo reunion di e Aña Parlamentario, 2025-2026, Parlamentario di Fraccion di MEP, Drs. Shailiny Tromp-Lee, a responde firmemente riba e atakenan di coalicion cu a purba tilda e oposicion di ta “desconecta”, “negativo” y “destructivo.” Tromp-Lee a enfatisa cu oposicion no ta aki pa daña nomber di ningun hende, sino pa accentua e tristo realidad cu Aruba ta bibando awe.
“Nos no ta negativo. E realidad ta cu ta e coalicion aki ta esun cu ta completamente desconecta for di e pueblo,” Tromp-Lee a duna di conoce. “E ta incomprendibel cu mientras e coalicion ta yena e sala cu elogio y aplauso pa e supuesto ‘bon trabou’ di Gobierno, nan mes ta cera wowo pa e falta di transparencia, e miedo pa debati, y e silencio di ministernan cu no ta rindi cuenta na e Cas di Pueblo.” Den e aña parlamentario nos no por a yama ni 1 reunion pa luna, anto nos ta bisa cu a funciona bon?
E propio coalicion ta victima di e silencio di Minister
Tromp-Lee a ilustra e falta di respet constitucional mustrando cu e propio parlamentarionan di coalicion ta keda ignora pa nan ministernan:
Un parlamentario di coalicion a haci 76 pregunta y a haya cero contesta.
Un otro a haci 180 pregunta y a haya solamente 6 contesta.
Un di tres a haci 221 pregunta y tampoco a haya niun contesta. Y asina por sigui menciona.
Ta incomprendibel cu nan ta haya esaki aceptabel y no ta compronde cu pa nos esaki ta mina democracia.
“Mi ta contento cu porfin dos parlamentario di coalicion a acepta cu esaki ta inaceptabel. Awe, despues di dos aña, nan ta lanta for di soño. Ban spera cu nan por vocifera e mesun disgusto aki den nan partijraad y den reunionnan cu nan propio ministernan, en bes di simpelmente ripiti e discursonan di Gobierno sin controla ni exigi transparencia.”
Trabou seriamente obstaculisa den Comision
Tromp-Lee a duna ehempelnan concreto di temanan substancial cu ta keda paralisa. Riba e ley di Landsverordening Toelating en Uitzetting (LTU) y e maneho di flexibilisacion, fraccion di MEP a manda preguntanan di profundo preocupacion cu a keda sin contesta. Riba e tema di nos Hobennan, e reunion den Comision di Labor pa atende e.o desempleo hubenil y e falta di ehecucion di e mocion pa introduccion di salario minimo pa hobena start, pero no a continua pa falta di e atencion necesario. “Nos tur sa kico ta pasa ora nos laga nos hobennan sin perspectiva,” e parlamentario a advirti.
Peticion urgente pa reunionnan publico riba crisisnan actual
Uniendo su mes na e peticion di su colega parlamentario Hart, Tromp-Lee a haci un apelacion directo y firme na e Presidente di Parlamento pa yama reunionnan urgente pa atende e topiconan cu di berdad ta keda pidi pa pueblo:
HOFA: Yama e reunion publico cu varios biaha a wordo pidi.
Tour Operators y UTV/ATV: Atende e crisis y e regulacion di e sector aki.
Hospital (HOH): Enfrenta e falta di recurso financiero pa operacion di HOH.
Falta di Liderazgo den Gobernacion: Aclaria con por ta posibel cu un caminda vital riba nos isla a keda cera sin cu niun minister sa of a duna ordo pa esaki.
E di dos ehempel di falta di liderazgo: Atende e ausencia di e Prome Minister cu ta simpelmente spoorloos.
“Nos ta aki pa exigi e respet y e control constitucional cu e pueblo aki merece. Esaki no ta destruccion, esaki ta e unico manera pa salba e democracia di Aruba,” Tromp-Lee a conclui.