Miembro di Parlamento Eduard Pieters (PPA) ta alerta cu e direccion cu e proyecto di Agri Innovation Park ta tuma, por resulta den un sistema cu ta “innovativo riba papel, pero inhusto den realidad.”
Mientras gobierno ta invoca e termino food security, Pieters ta adverti cu sin un rol central pa nos agricultor- y cunukeronan local, Aruba lo sigui depende di importacion y perde su oportunidad pa sostenibilidad real.
Un paso positivo cu un eror strategico
Pieters a expresa satisfaccion cu gobierno finalmente ta trata e tema di seguridad di alimentacion cu seriedad, pero el a enfatisa cu e manera cu e destaho publico ta formula ta saca nos propio pueblo afor. “Nos ta papia di ‘innovacion’, pero e destaho aki ta pidi experiencia cu ningun cunukero of agricultor Arubiano tin; glastuinbouw na nivel Hulandes,” el a bisa.
“Na final ta un stranhero lo haya e contrato, mientras cu nos agricultornan ta sigui pidi ayudo di awa pa nan planta.”
Sostenibilidad mester ta adapta na nos realidad
E fraccion di PPA ta insisti cu si Aruba kier inovacion agricola, esaki mester ta adapta na su medio ambiente seco y limita. Segun Pieters, nos agricultornan mes a propone varios idea briyante:
– Uzo di agrivoltaica (agrisolar) pa produci energia y sombra pa plantacion.
– Hydroponics pa planta sin depende tanto di awa.
– Robotics y drones pa asisti cu cosecha y mantencion.
– Integracion di inteligencia artificial pa monitorea crecemento y produccion.
Esaki ta inovacion real, cu ta crece for di nos mesun tera, no importa di e paisnan friu.
Un modelo logico pa un futuro Arubiano
“Nos mester stop di importa modelo di otro paisnan y cuminsa crea un modelo cu ta Arubiano di berdad,” Pieters a declara. Y no ta cuestion di inventa e wiel, pero haci uzo di loke tin caba na e paisnan cu ta aplica e metodonan aki basa riba investigacion.
“Si nos no ta inclui nos pueblo den e concepto di innovacion, nos ta perde e escencia di sostenibilidad. Food security sin nos cunukeronan no tin sentido,” Eduard a termina bisando.