Parlamentario Eduard Pieters a bishita Stichting Hunto pa presencia e lansamento oficial di un
trailer innovador cu nan lo uza den centro di ciudad pa atende cu e grupo di adicto ambulante.
Pa Pieters, e iniciativa aki no ta solamente un proyecto social, sino un señal cla cu Aruba ta
cuminsa traha cu creatividad, humanidad y determinacion pa enfrenta un di e retonan mas
compleho den nos sociedad: adiccion y salud mental.
E proyecto ta enfoca riba acercamento directo na e hendenan cu hopi biaha ta cay afor di
sistema tradicional di cuido. Un iniciativa humanitario cu merece reconocemento
Pieters a expresa su gratitud profundo pa e ekipo di Stichting Hunto, specialmente na su
directora Dalgis Montalvo y CFO Randall van Trigt, cu a demostra liderazgo y compromiso
extraordinario den e veld di salud mental. Segun Pieters, Stichting Hunto ta un ehempel pa hopi
fundacion na Aruba. Un elemento cu el a destaca tabata e transparencia di gobernacion di
fundacion, mirando cu nan a presenta nan relato financiero anual 2025 den luna di maart 2026.
Pa fraccion PPA, gobernacion transparente y responsabilidad financiero ta algo cu mester haya
su reconocemento.
“Si algo ta bon, nos mester reconoce esey tambe y pone den luz positivo,” Pieters a enfatisa.
E trailer: un brug pa e hendenan cu e sistema hopi biaha no a yega na nan
“E trailer lo sirbi como un punto di contacto mobil pa e adictonan ambulante den centro di
ciudad. Hopi persona cu ta biba den adiccion no ta drenta facil den institucion formal. E trailer
ta crea un espacio mas accesibel, unda personal capacita por combersa cu nan, crea confianza y
motiva nan pa cuminsa un trayecto di recuperacion,” Eduard a expresa.
Segun Pieters, hopi hende inicialmente no tabata kere den e concepto aki. Pero awe e iniciativa
ta bira realidad y por marca un paso importante den tratamento comunitario di adiccion.
E enfoke aki ta basa riba dignidad humano: e adictonan ambulante tambe ta hende.
Un cadena di cuido cu ta conecta diferente Fase di Recuperacion
E trailer no ta un solucion aisla. Ta parti di un cadena mas amplio di cuido cu Stichting Hunto ta
implementa. Despues di e prome contacto, e persona cu ta dispuesto pa cambia por haya guia
pa:
● Inloophuis, unda nan por haya un espacio safe pa descanso, dialogo y orientacion;
● Centro Colorado, unda nan por drenta den un programa completo di rehabilitacion;
● y finalmente un trayecto di reintegracion social pa por participa atrobe activamente den
comunidad.
E modelo aki ta reconoci internacionalmente como uno di e forma mas efectivo pa trata
adiccion: acompañamento paso pa paso.
Salud Mental mester cooperacion, no competencia
Durante e encuentro, Pieters a subraya un mensahe importante pa tur e sector di salud mental:
cooperacion y colaboracion ta esencial. Segun e parlamentario, e unico manera pa enfrenta e
reto creciente di salud mental na Aruba ta pa tur institucion; gobierno, fundacion y e
profesionalnan traha hunto den un cadena coordina di cuido.
“Nos mester laga ego un banda,” Pieters a indica. “Ora nos traha hunto, nos por logra
solucionnan real pa nos pueblo.”
E lansamento di e trailer di Stichting Hunto ta un paso innovador den lucha contra adiccion na
Aruba. Pa Pieters, e iniciativa aki ta mustra cu ora e organisacionnan civil, e profesionalnan y
comunidad uni esfuerzo, solucion humano y practico ta posibel. “Fraccion PPA ta expresa su
reconocemento profundo pa e trabou duro cu Stichting Hunto ta haci den nos comunidad.
Pasobra tras di cada adiccion tin un historia humano y cada persona merece oportunidad pa
cuminsa atrobe,” Eduard a finalisa bisando.
