Lider di fraccion di PPA, Eduard Pieters, ta cuestiona con Gobierno ta atendiendo cu e deterioro di infrastructura escolar na Aruba. Segun Pieters, e situacion cu algun scol ta enfrenta awe no a aparece diripiente, sino ta consecuencia di e añanan di atraso, falta di control y principalmente, falta di planificacion structural.
Renobacion grandi urgente
Pieters ta reconoce cu diferente scol tin necesidad urgente di renobacion y mantencion grandi. Sinembargo, ora schoolbestuur y Gobierno laga e problema acumula pa añanan largo, eventualmente e ta yega na un punto, caminda reparacion ta bira mas grandi, mas costoso y mas dificil pa ehecuta. “Si bo planifica bo cosnan bon, bo no mester warda te ora un scol ta den mal estado, pa cuminsa busca solucion.”
Preparacion y conocemento profesional
Un di e puntonan cu Pieters ta cuestiona ta e preparacion di e proyectonan y e calculonan cu Gobierno ta uza, prome cu bay den un destaho publico. Segun Pieters, si Gobierno kier renoba un scol, e mester prome busca e profesionalnan cu conoce infrastructura y construccion, determina exactamente kico mester haci y prepara un calculacion realistico di e costo. Esey ta evita cu Gobierno ta pone un suma den presupuesto, cu despues no ta cuadra cu realidad di mercado.
Pieters ta referi loke Minister di enseñansa a menciona como problema. Esta e situacion caminda un proceso di ‘aanbesteding’ por termina cu e ofertanan cu ta considerablemente mas halto, cu e suma cu Gobierno a calcula. Resultado: e proyecto no por sigui manera planifica y e scol cu mester renoba, ta sigui warda.
Pa Pieters, esaki no ta solamente ta un problema financiero, sino un problema di gobernacion y vision.
“Investiga prome, presupuesta despues”
Pieters ta propone un otro forma di traha: Gobierno mester haci un inventarisacion completo di e condicion di e scolnan, determina prioridad y despues conecta e necesidadnan cu un plan financiero di varios aña. “Bo mester sa kico ta e realidadnan den e scolnan.”
Segun e lider di fraccion, no tin sentido pa cada aña Gobierno reacciona na e problema mas urgente, sin atende e causa structural. Un scol no ta bira ruina den un dia. Deterioro ta un proceso, cu por identifica y anticipa si tin inspeccion, mantencion preventivo y planificacion structural. Pero Pieters ta bay un paso mas leu.
Revision di e gastonan regular
Segun Pieters, Aruba mester revisa tambe e manera cu Gobierno ta financia e scolnan pa nan gastonan regular. E suma cu ta otorga mester refleha e realidad actual: inflacion, costo di bida, mantencion y e gastonan real cu e scolnan ta enfrenta. Pieters a señala cu ta necesario pa haci un investigacion serio, pa determina si e montantenan actual, realmente ta suficiente.
No simplemente asumi cu “placa ta yega”. E pregunta mester ta: pa kico e placa ta yega y pa kico e no ta yega?
Un fondo pa mantencion grandi
Un di e solucionnan concreto cu Pieters ta pone riba mesa ta creacion di un fondo dedica pa “groot onderhoud”, esta mantencion grandi di infrastructura escolar bou di un Aruba Property Fund cu lo percura pa e.o. maneha, renoba, mantene edificionan di Gobierno y eventualmente scolnan cu Gobierno ta cubri nan gastonan.
E meta principal ta pa e scolnan no mester yega cada biaha na un situacion di emergencia prome cu Gobierno libera fondo pa drecha dak, sistema electrico, baño, structura of otro parti esencial di edificio. Pa Pieters, e discusion no por termina cu pregunta di cuanto miyon Gobierno ta dispuesto pa gasta. E pregunta politico mas importante ta, si Aruba finalmente lo cambia di un sistema di reaccion pa uno di planificacion.
Pasobra cada biaha cu Gobierno calcula malo, atrasa un destaho of no reserva fondo na tempo, no ta solamente un proyecto ta keda atras. Ta e maestro y e studiantenan ta paga e prijs di falta di planificacion y vision.