ORANJESTAD,Aruba
Di acuerdo cu Parlamentario Endy Croes Aruba poko poko pero sigur ta saliendo for di e crisis cu corona virus a ocasiona. E no ta un tarea facil y lo tuma su tempo. Riba e tema primordial esta salud Aruba actualmente ta Covid 19 “free” y gobierno a score un tien (10) pa e seriedad y strategianan usa pa cu esaki. E parti doloroso awor ta nos economia cu nos mester deal cune y despues cu fontera habri con lo atende dado caso e corona virus hasi su re-entrada cual posibilidad ta uno hopi grandi. Pa esaki tambe gobierno tin su plannan y lo atende cunan diligentemente.
///Parlamento durante reunion publico a pasa diferente mocion
Dia 26 di mei ultimo Parlamento a trata den reunion publico e tema eseñansa unda Minister Lampe tabata presente di mainta te anochi laat den sala. Minister Lampe a splika hopi amplio tur su ideanan y su beleid. Berdaderamente Minister tabata bon documenta y cu hopi planes nobo y noble cual ta rekeri cambionan grandi. Sinembargo Parlamento por a nota falta di comunicasion entre e minister y docentenan den field pa cu e plannan y cambionan grandi aki. Na final di e reunion aki Fraccionnan di MEP-POR-RED a presente y sostene 5 mocion. Un mocion tabata pa gobierno brinda atencion y sosten e 100 werksternan pa nan no perde nan trabou. ( AVP a vota contra e mocion aki). Demas mocionnan den liñanan grandi a urgi Minister Lampe pa bay bek mesa comunica y dialoga cu docentenan y/of representante di docentenan. Tambe a urgi Lampe pa “hold” algun projecto pa no hasi tur cambionan hunto y tuma mas tempo pa dialoga y splika esakinan promer cu bay over na ehecutanan dado caso jega asina leew pa ehecuta tur.
/// Gobierno a tuma algun desicion cumpliendo cu mocionnan di Parlamento:
Gobierno diabierna ultimo a anucia algun desicion cu a wordo tuma despues di a delibera cu mayornan, alumnonan, docentenan y comision di alumno den consulta cu Minister Lampe alrespecto e tema enseñansa. Minister lo bin cu un management team y lo bay den dialogo pa e siguiente 12 lunanan pa asina tuma un desicion final si Colegio Sanicolas lo bay over na un tweetallig onderwijs. Mientrastanto Colegio Sanicolas ta keda un school publico y no lo wordo transpasa pa De Schakkel. Tambe Minister Lampe hunto cu sosten di gobierno a dicidi cu Fontein kleuterschool y Colegio Hilario Angela lo keda school publico pero lo bay duna les na un otro systema esta e systema hopi renombra di Montesori. Otro desicion cu Minister Lampe a tuma hunto cu gobierno ta cu school Paso Pa Futuro y Emma School lo keda separa y brinda eseñansa na nos alumnonan cu tin mester di extra atencion. Mavo school Ceque y Juliana School tambe lo permanese schoolnan publico cu acceso pa tur alumno.
/// Minister Lampe a contesta Parlamento lo siguiente:
Durante e reunion publico di 26 di mei Parlamentario Endy Croes a puntra Minister lampe publicamente si ta berdad cu a tuma desicion caba cu EPI lo bay cay bou SEPB. Minister Lampe a splika hopi kla cu tin combersacionnan a inicia pero no tin ningun desicion manera SIMAR tabata pretende. Cu e mocionnan pasa den Parlamento pa comunica y dialoga promer cu tuma cualkier desicion final nos por a tuma nota recien cu e anucio di gobierno cu EPI no lo bay cay mas bou SEPB pero si durante e aña escolar nobo lo jega na palabracionnan nobo hunto cu docentenan pa un mihor doorstroom di SEPB pa EPI. Finalmente Abraham de Veer lo keda un school publico y no lo bay cay bou SPCOA. Pues despues di basta dialogo tin desicionnan tuma pa e bienestar general den crisis. Parlamentario Endy Croes ta gradisi Minister Lampe y Gobierno di Aruba den su totalidad pa brinda atencion na mocionnan cu a ser aproba den Staten alrespecto educasion.
