Politica

Parlamentario Endy Croes: FCCA lo traha 200 cas den 2020. “Tin un lista di peticion di 2500 di cual 726 ta solicitud di personanan riba 60 aña”


ORANJESTAD, Aruba

Parlamentario Endy Croes na final di 2019 a haci algun pregunta na FCCA pa asina por tin informacion mas alcaso y por compronde e tema di vivienda mas al fondo. Riba e pregunta cuanto peticion tin pa cas na FCCA nos a ricibi informacion cu e lista actual ta di 2500 peticion y esaki ta creciendo. Tambe a busca informacion cuanto di e peticionnan aki ta di personanan riba 60 aña. A resulta cu 726 peticion di e total di 2500 peticion ta trata di personanan riba 60 aña. 

Tambe a busca informacion alrespecto un reclamo cu sa yega na Parlamento cu tin hende cu tin 10 aña en espera di un cas y tin otro cu menos aña ta haya promer cu nan. Berdad nos a wordo splica cu e wachtlijst ta uno largo pero tambe FCCA ta tene cuenta cu e situacion di cada caso y akinan mester bisa tin casonan cu ta sumamente urgente cu berdaderamente ta pasa bay mas dilanti den e wachtlijst. Esakinan ta casonan conoci como “schrijnend gevallen”. 

FCCA a logra haci su maximo esfuerso den 2019 y a logra construi 202 cas di cual drentando e ultimo kwartaal 100 cas tabata cla y a wordo entrega y 102 cas tabata den e parti final di construccion. Den aña 2020 FCCA tin programa pa construi 200 cas atrobe. Pues nos ta papia di construccion di 402 cas den 2 aña (2019 y 2020). Esaki ta muestra cu e Gobierno aki tin e hende central y ta pushando den temponan dificil pa soluciona tur e problemanan hereda lo mas tanto posibel. 

Alabes 1 di november ultimo mediante un Ley Landsverordening houdende afwijking van enkele Landsverordening in verband met de uitgifte in erfpacht van een aantal overheidspercelen met daarop gebouwde woningen, Parlamento a aproba e ley unda 512 famia adicional por bira felis door di pasa aktenan pa obtene nan propio cas. 

Parlamentario Endy Croes a bisa cu tempran den aña lo pidi FCCA un reunion pa asina ricibi un otro update total di e maneho di FCCA y di e situacion actual y tambe pa keda monitor si tur cos ta cana di acuerdo cu plannan pa asina por alivia necesidadnan den comunidad mas tanto posibel. 

Related posts

Minister Dangui Oduber: Gobierno ta tumando tur paso pa preveni casonan di coronavirus cu lo por drenta Aruba

EA News Author

Muchanan di Kids@Work Camp a bishita bestuurskantoor y sera conoci un tiki di e trabao di gobierno

EA News Author

Parlamentario Ricky Hoek: Un weekend activo tras di lomba pa Gabinete Wever-Croes II

EA News Author

Leave a Comment