ORANJESTAD, Aruba
Parlamentario Endy Croes deseando henter pueblo un biaha mas un feliz entrada di 2020. Nos a yama ayo na aña 2019, un aña cu tabata tin hopi reto. No obstante tur e retonan por a tuma nota di un gobierno cu Ministernan cu curashi. Si nos analisa e reto di mas grandi cual ta e reto financiero por tuma nota cu a lora manga di camisa y a traha pa logra metanan comprometi cu Hulanda pa rescata nos pais. Sigur no ta un reto facil despues di a hereda un crisis y un desaster financiero for di man di Mike Eman y AVP.
Con Mike Eman a laga Aruba
Mike Eman a presta den 8 aña 2200 miyon florin cual ta igual na 2.2 Biyon florin. Banda di esaki Mike a redobla e interes riba placa presta. Den 2019 mester a paga 232 miyon florin solamente na interes. Banda di esaki un otro 80.9 miyon florin na proyectonan PPP cual nos mester paga pa 20 aña largo te na 2039. Den tur e tempestad aki cu hopi curashi a logra bin cu un maneho financiero sostenibel. A logra baha e deficit di Mike Eman y AVP den 5 aña di 444 miyon florin pa solamente 4 miyon florin na 2019. Pa 2020 Aruba lo alcansa un Surplus di 25 miyon pa promer biaha den 11 aña. E ultimo Surplus tabata bou di maneho di MEP na 2008. Dunando un ehemplo con a corta gasto: Mike Eman tabata tin 400 coordinador di cual 147 ta emplea directamente den su oficina costando pueblo 11.3 miyon pa aña. Evelyn Wever Croes sinembargo a corta esaki di 147 empleado den oficina di Promer Minister pa solamente 21 cu un costo di 2.5 miyon. Pues un rebaho di 8.8 miyon pa aña solamente den un oficina cual ta igual na un rebaho di 78%. Asina tin hopi ehemplo mas unda por mustra pueblo e sacrificionan cu mester a haci pa logra finalmente den 2019 un deficit di solamente 4 miyon florin.
Indicadornan ta mustra positivo den 2020
Den aña 2019 apesar di e retonan a logra aumenta salario minimo, aumenta pensioen pa soltero y pareha, reduci desempleo y reduci prijs di coriente cu 10% pa pueblo, 9% pa fundacion, misa y schoolnan y 7% pa comercio. Tur a drenta na vigor entrante 1 di januari 2020. Alabes e reforma fiscal a trece alivio pa e grupo mas grandi y esnan mas vunerabel. Banda di esaki a reduci belasting riba dividendo di 25% pa 10% y lo mantene e reduccion aki den 2020. A logra pone promer piedra pa un hotel na San Nicolas, esta Secrets Hotel y lo desaroya Baby Beach. San Nicolas den añanan nos dilanti lo bay conoce un cambio grandi. Durante aña 2020 FCCA lo construi 200 cas y asina atende cu e scarcedad di cas pa pueblo. Indicadornan ta mustra cu señalanan ta sumamente positivo y inversionistanan poco poco ta ganando e confiansa bek. Gobierno lo sigui stimula hobennan entrepeneur y lo sigui enfoca pa reduci mas ainda e desempleo den 2020.
Parlamentario Endy Croes ta pidi tur cu ta biba riba e baranca aki “hunto” nos por logra mas. Ban scoge e caminda di “0” polarisacion y ban pa e caminda di dialogo y comprension y asina duna bo contribucion pa pone Aruba den poco aña bek riba pia. Tur cu tur nos ta bay tin un bon aña 2020.
