Politica

Parlamentario Endy Croes: Solidarismo ta essencial pa cu pueblo Parlamentarionan y Ministernan ta entrega 25 mil florin cada un


ORANJESTAD,Aruba

Di acuerdo cu Parlamentario Endy Croes esaki ta un momento hopi essencial pa cada un di nos refleha y pone nos curason na e lugar corecto. Mundo a wordo sorpresa pa un virus esta Corona Virus of tambe conosi bou Covid 19. Un guerra di henter mundo contra un enemigo cu Bo no por ni mira. Un total di mas di 700 mil infectado rond mundo cu mas di 33 mil morto sin indicasion ainda ki dia y con esaki lo termina y /of lo por wordo controla. Aporta Bo tambe y Keda Cas pa hunto nos bringe.

Aruba a tuma medidanan di prevension:

Esaki a trese cune cu Aruba manera diferente otro paisnan rond mundo mester a sera su fronteranan tumando hopi medidanan di prevension y unico manera pa bringa e virus aki y pa “flatten the curve”. Pues keda cas! Den conecion cu esaki gobierno ta hasiendo un tremendo trabou.

Tursimo a cay na “0” y 25mil hende a perde trabou:

Hotelnan, casinonan, tur negoshinan cu ta draai di actividadnan di turismo mester a sera nan portanan y termina tur nan actividadnan economico. Cifrasnan di SVB y expertonan a indica cu 25000 persona a perde nan empleo directamente reparti den 23000 empleado di dicho sectornan mas 2000 ZZP’rs ( zelfstandig zonder personeel) manera por ehempel taxistanan cu ta cay den e grupo aki esta (ZZP). Den e crisis aki mesora expertonan di Banco Central a produci un rapport ( advies) di e efectonan financiero mientras Economische Zaken tambe a hasi su calculacionnan di e impacto y a refleha esaki den un rapport.  Standard & Poors tambe a traha un rapport evaluando e impacto di 122 pais entre otro Aruba cual a sali hopi malo.

Parlamento a trata presupuesto diamars siman pasa:

Parlamento a trata presupuesto di pais Aruba diamars siman pasa cual presupuesto lamentablemente a bolter di un surplus di 46 miyon pa un deficit di 1.3 biyon. Henter mundo a sinti e “golpi” aki y tur gobierno rond mundo mester a ahusta nan presupuesto y pidi ayudo financiero. Aruba no tabata diferente. Lamentablemente oposicion a bandona sala y no a vota pa e presupuesto aki y a nenga asina di brinda ayudo na e 25mil mama y tatanan di famia cu a perde nan trabou.

Parlamentario y Ministernan lo entrega 25 mil florin como muestra di solidaridad:

Den e proceso aki Parlamentarionan y Ministernan di Pais Aruba a sinti nan mes jama como e promernan pa duna e ehempel pa ta solidario cu pueblo primordialmente pa e 25 mil mama y tata di famia cu a perde trabou. Diabierna ultimo den oranan di mainta Fraccionnan di Coalision a entrega finalmente e Ley di Solidaridad unda cada Parlamentario y Ministernan lo entrega alrededor di Afl. 25 mil florin for di nan salario y beneficionan durante aña 2020. E ley ta stipula cu esaki lo cuminsa desde 1 di April 2020 pues si ley wordo trata poko mas laat mes esaki lo ta retroactivo. Solidaridad ta hopi importante den e momentonan aki hustamente e momento di mas duro pa hopi famia cu a perde trabou y ta bibando den angustia na e momentonan aki.  Cu e ley aki Parlamentarionan y Ministernan lo aporta na e manera corecto como ehemplo y solidarismo. Terminando Parlamentario Endy Croes ta felicita tur cu a traha riba e ley aki y a vocifera cu pueblo por ta trankil y sigur cu Parlamentarionan y Ministernan ta convivi e momentonan dificil aki cu cada un di bosonan. Cu Fe y speransa den nos creador combina cu union nos lo surpasa e etapa di bida aki.    

Related posts

Van Huffelen di bishita na Aruba na Archivo Nacional

EA News Author

Parlamentario Alan Howell cu dos peticion special na Minister di Asuntonan Social Unblock y elimina boet riba tur onderstand y bijstand

EA News Author

Huez a duna Serlimar aprobacion y espacio pa sigui sanea e compania

EA News Author

Leave a Comment