Mientras mas tempo ta transcuri desde e momento di nos Status Aparte, mas nos ta lubida e lucha di Betico. Den mi opinion no tin ningun hende cu por a splica e lucha aki miho cu abogado John van der Kuyp q.e.p.d. Ora mi tabata mucha, John van der Kuyp tabata bin cas na Seroe Biento hunto cu e grupo di Full Gospel Businessmen Fellowship. Despues cu mi a bay studia derecho mi por a compronde John van der Kuyp su splicacion hopi mas miho. Ta nos deber pa sigui conta e historia aki pa nos yiunan, pa nan sa cu e ta tuma inteligencia, curashi y sacrificio pa logra cosnan grandi.
Durante añanan 20 di siglo 20, ainda Aruba su poblacion tabata hopi chikito y economicamente nos isla tampoco tabata representa mucho. Cu e yegada di e refineria a bin hopi cambio. Nos economia a cuminsa florece y nos poblacion a cuminsa crece lihe. Den e ambiente aki consciencia politico a cuminsa florece. Señor Henny Eman bieu, cu tabata hopi pro e monarkia Hulandes, a sigui alimenta e consciencia politico aki. Señor Henny a lucha duro pa loke e tabata yama “separacion”. E tabata boga pa e transferencia di poder di Curaçao pa instancianan local, pa asina Aruba haya mas autonomia pa maneha su propio cas. E movimiento aki a keda principalmente enfoca riba derecho constitucional Hulandes. Esaki a keda demostra den añanan 30, pasobra Henny Eman Sr. y otronan politico Arubano tabata boga pa Aruba bira un tipo di municipio Hulandes. E esfuerzo aki pa realisa e soño di mas autonomia a base di derecho constitucional Hulandes a haya un impulso importante ora Henny Eman Sr. a busca colaboracion cu dr. Moises da Costa Gomez. Hunto nan a desaroya e idea pa un peticion na Hulanda pa un status aparte pa Aruba, esta un status separa di e demas isla Caribense di Reino. E idea aki a ser presenta riba 18 di maart 1948 na gobierno Hulandes pa e yiu di Henny Eman Sr., esta Shon A. Esaki a tuma luga durante e Conferencia di Mesa Rondo na Den Haag cu tabata trata e reorganisacion di Reino. Shon A a continua cu e linea estatal aki te na su morto na 1967.
Durante añanan 70 e hoben Gilberto François (Betico) Croes scoge pa un liña hopi mas revolucionario. Betico a lucha pa e emancipacion politico a base di derecho internacional, poniendo pueblo di Aruba den mesun categoria cu otro pueblonan colonisa. P’esey Betico a exigi autonomia a base di e derecho di tur pueblo pa determina su mesun futuro. Betico tabata sumamente inovador den su strategia, pasobra ta apenas na aña 1970 cu e Asamblea General di Nacionnan Uni a describi e derechonan aki di e siguiente forma den su Resolucion 2625:
“A base di e principio di igualdad di derecho y di e liber determinacion di e pueblonan, consagra den e Carta di Nacionnan Uni, tur pueblo tin e derecho di determina liberamente, sin metemento externo, su condicion politico y di sigui su desaroyo economico, social y cultural, y tur estado tin e deber di respeta e derecho aki di acuerdo cu e disposicionnan di e Carta.”
Betico a siña nos cu ta pasobra nos ta un pueblo, nos tin e derecho internacional di autodeterminacion. Pa prueba cu Aruba realmente ta un pueblo, Betico a dedica su mes na fortalece nos symbolonan di identidad Arubano, manera nos Papiamento. Pero tambe el a lucha pa introduci symbolonan nobo, manera nos bandera.
E lucha di Betico a keda intimamente refleha den nos bandera. Un bandera cu ta representa un isla dorna cu palma y rondona di santo blanco situa den lama grandi, unda solo semper ta briya. Pero, e mensahe di nos bandera ta bay mas profundo. Riba e tela blauw tin un strea cora cu blanco, di cuater punta, den skina ariba na man links. E strea ta bisa nos cu Aruba tin un posicion di honor memey di e nacionnan cu ta rondona nos. E strea cora cu blanco tambe ta simbolisa e caracter amabel di nos pueblo, cu tin respet pa husticia, orden y libertad, pero cu semper ta dispuesto pa sacrifica hasta su sanger pa libertad, manera e indjannan a haci na Rooi Frances. E bandera ta enfatisa nos anhelo di ta soberano, pero sin isola nos mes di esnan cu ta rondona nos. Esaki ta ser simbolisa pa e dos strepi geel, mustrando cu nos tur mester tin un posicion liber den e mesun lama blauw.
Ora nos ta mira e bandera na laira, corda e lucha pa soberania cu nos bandera ta refleha y e oracion di nos himno na Papa Dios pa nos conserva nos amor pa libertad!