E polemica rond di e biahe di Minister Gerlien Croes den un jet priva a escala na un nivel institucional halto. Parlamentario Rocco Tjon (MEP) a duna detayenan riba e pasonan cu fraccion di oposicion a tuma pa busca claridad, denunciando un falta di transparencia den Parlamento y señalando posibel violacionnan di ley cu por tin consecuencia serio pa e funcion di e mandatario.
Desde december di aña pasa, Parlamento ta den un lucha pa haya contesta. Segun Tjon, a solicita reunionnan cu Minister Gerlien Croes y Minister Wendrick Cicilia, pero e President di Parlamento Marlon Sneek no a honra e peticionnan aki ainda. E parlamentario a revela cu a manda no menos cu 10 carta di recordatorio pa e presidencia, sin exito. “Ta parce cu tin un preferencia politico caminda miembronan di AVP ta haya reunion rapido, mientras ta stroba e trabou di oposicion,” Tjon a expresa.
Posibel violacion di ley y e ‘Screening’
E nucleo di e investigacion ta sinta riba e legalidad di e buelo y e forma di pago. Un opinion juridico a wordo presenta caminda ta indica cu:
- Aviacion Americano: Si Minister Croes a paga for di su mesun saco pa e biahe, e por a viola leynan di aviacion di Merca (FAA).
- Falta di Licencia Comercial: Minister Wendrick Cicilia mes a confirma cu e avion en cuestion no tin un licencia comercial. Esaki ta nifica cu legalmente e no mag di ricibi ningun tipo di pago pa realisa buelo.
- Consecuencia Politico: Parlamentario Tjon a recorda cu e Ley di Screening ta hopi cla: un minister cu viola ley no por keda den su funcion.
Intervencion di Gobernador
Debi na e loke ta wordo considera un “blockeo” den Parlamento, e fraccion di MEP a escala e asunto pa Gobernador di Aruba. Dia 23 di april, Su Excelencia a contesta e cartanan, indicando cu el a traspasa e preocupacionnan aki pa Prome Minister Mike Eman. Segun e procedura, e Prome Minister ta esun encarga pa responsabilisa su ministernan ora tin indicacion di actuacion contra ley.
Den espera di “Politica Nobo”
E pueblo di Aruba ta keda pendiente pa mira si Minister Gerlien Croes lo bini dilanti pa practica e “politica nobo” cu e ta boga pe. E preguntanan fundamental cu ainda no tin contesta ta:
- Ken a paga pa e buelo ey?
- Cuanto a wordo paga?
- Ki dia e transaccion aki a tuma lugar?
EA News lo sigui e caso aki di cerca, vigilando e transparensia y integridad cu mester prevalece den nos gobernacion, pero na mes momento si Minister Gerlien Croes ta digno pa tin un stoel di minister mirando e violacion di Ley di Screening pa minister nan.