Durante un reunion reciente di Comision di Turismo hunto cu representante di AHATA, a presenta dato relaciona cu e grado di ocupacion di hotelnan den luna di september. Segun Parlamentario Jennifer Arends-Reyes, e situacion actual den turismo no ta mustra un bahada den cantidad di bishitanan cu ta yega na Aruba, pero si ta pone den evidencia un shift den escogencia di tipo di acomodacion cu e turista ta preferi.
Arends-Reyes ta indica cu Aruba tin mas camber di hotel disponibel compara cu tempo pasa, y ademas desde 2018 a mira un aumento constante den e uso di short-term vacation rentals manera apartament y casnan di vakantie pa corto estadia. A pesar cu Average Daily Rate (ADR) ta keda relativamente halto, stimula tambe pa apertura di varios hotel high-end cu ta sostene e nivel di ADR y REVPAR, e crecementu grandi den short-term vacation rentals ta exigi un atencion mas structural.
“Esaki no ta solamente un tema di mercado, pero tambe di cumplimento, higiene y siguridad,” asina ta splica Arends-Reyes. “Tin hopi propiedad cu ta cumpli cu su obligacion fiscal y mantene bon standard, pero tambe tin un grupo significativo cu no ta cumpli. E sector aki ta opera manera negoshi y mester trata manera tal, pa crea un tereno di competencia husto riba mercado y pa proteha reputacion turistico di Aruba.”
Di parti di Parlamento, Arends-Reyes a entrega un mocion pa urgi gobierno presenta un plan di accion cla pa regulacion y cumplimento di short-term vacation rentals. E obhetivo ta pa mantene un balans sano entre hotel, turista y comunidad, sin stroba crecemento, pero stimulando transparencia y responsabilidad.
Press release: AVP
