Featured Politica

Parlamentario Marco Berlis (MEP): Estadisticanan ta mustra cu famianan saludabel ta produci un generacion fuerte


Numeroso investigacionnan haci riba tereno familiar ta mustra e importancia di e rolnan di e tata y mama den e structura di un famia. E presencia, amor, atencion, guia y disciplina cu mayornan ta duna y modela na nan yiunan, ta vital pa nan formacion y conducta. Investigacionnan haci ta mustra cu muchanan cu ta wordo cria den un hogar tradicional unda cu e mayornan ta casa, tin hopi menos chens di mustra diferente sorto di problema (academico, social, emocional, cognitivo), no solamente den nan niñes pero tambe despues como adulto. Famianan cu ta consisti di ambos mayornan, tata y mama, generalmente ta garantisa cu e muchanan tin mas acceso na recursonan economico. E mayornan aki tin e abilidad pa reparti nan tempo, placa y energia y estadisticanan ta mustra cu yiunan den un famia asina aki mayoria di biaha ta e centro di atencion den e hogar. Den otro palabra, e yiunan ta haya e atencion y amor cu nan merece y asina por wordo lanta den un hogar adecua.

Algun otro beneficionan pa muchanan cu ta biba den un famia tradicional:

Muchanan bibando den un hogar asina aki, mayoria biaha ta mas envolvi den actividadnan di comunidad manera deporte, ta tuma iniciativanan pa busca un carera academico y ta bay universidad y eventualmente ta logra un carera profesional. Tambe investigacionnan ta mustra cu ora tin hopi famianan fuerte, esaki ta subi porcentahe di graduacion di studiante na scol, universidadnan y ta haci cu tin mas hende ta wordo emplea. En general, famianan cu ta saludabel y fuerte ta hopi mas stabiel. E mayornan tin e tendencia pa ta mas envolvi cu nan yiunan y ta inverti hopi mas tempo pa yuda nan yiunan bira exitoso den bida. 

Estadisticanan pa muchanan cu no ta biba den un hogar tradicional:

Despues di divorcio, muchanan tin 50% mas chens di tin problemanan cu nan salud compara cu muchanan cu ta parti di un hogar unda cu mayornan ta biba hunto. Den hogarnan unda muchanan ta biba cu un padrastro, muchanan tin un probabilidad mas halto di wordo expulsa for di scol, tin mas probabilidad cu nan por conecta den delincuencia, di tin problema cu docentenan na scol, no ta haci huiswerk, tin puntonan mas abao cu esnan cu ta biba den un hogar y famia tradicional. Ora muchanan ta wordo cria den un famia tradicional den cual e mayornan ta casa, esaki ta reduci e probabilidad cu e mucha lo biba den pobresa cu 82%.

Ta pesey e ta di vital importancia pa parehanan y matrimonionan por tin lugarnan cu nan por bay, expertonan y conseheronan cu experiencia cu nan por aserca, ora cu nan tin conflictonan. Matrimonio ta un reto grandi, y hopi biaha ta bay conseheria solamente ora tin problemanan of ora ta mucho laat. Matrimonionan saludabel lo produci muchanan fuerte, cu lo sa di guia y fortifica e futuro di nos pais!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!

Related posts

E fecha final pa paga impuesto di vehiculo di motor ta 2 di augustus 2021

EA News Author

Discurso di Minister Xiomara Maduro durante Manifestacion Cultural Celebracion Dia di Betico: Danki Na Nos Libertador Pa Tur Su Logronan Pa Pais Aruba

EA News Author

Otmar lo haci denuncia bek contra Marisol riba denuncia falso

EA News Author

Leave a Comment