Un mita berdad ta un mentira completo. Ora cu politiconan di oposicion ta conta solamente parti di e proceso di e investigacionnan cu a tuma lugar, y ta laga intencionalmente detayenan y documentonan afo di kico hues y OM a bisa specificamente den e vonnis y rapport, bo sa cu esaki ta sirbi nan gañamento y teoria falso. Ta pesey den un forma consistente y cu prueba na man mi ta sali un biaha mas pa pueblo, cu merece e storia completo y e berdad pa por analisa y conclui riba su mes kende ta hungando “politricks;” esta politica cu triki sushi. Ex Minister Otmar Oduber, cu den e tempo ey tabata minister di Turismo di AVP, a entrega un keho oficial contra sr. Edison Briesen pa malversacion y pa falsificacion di documentonan. Riba e fecha di 5 di Maart 2012 OM ta contesta esaki y ta duna splicacion pakico OM NO ta bay persigui sr. Briesen penalmente:
- No tin evidencia algun cu tabata tin malversacion di placa. Basa riba investigacionan haci pa Landsrecherche no tin manera pa establece cu tabata tin malversacion. (Pag.4/6)
- PG a recomenda den su carta di 18 di januari 2010 pa laga CAD investiga e aspectonan financiero. Den menos di 4 dia, esta 22 di Januari, e rapport di CAD tabata cla caba y segun OM esaki NO a duna niun claridad den e finansas di e festival. (Pag.3/6)
- Conclusion di OM: No tin suficiente material pa procede penalmente contra sr. Briesen. (Pag.5/6)
- E fecha di e contract por wordo splica aceptablemente y no tin manera pa demostra cu esaki no ta e berdad. (Pag.4/6)
- No tin indicacion algun di malversacion. (Pag.4/6, 5/6)
- OM no ta haya cu sr. Briesen a kibra e ley di contabilidad. El a uza un MB manera el a haci semper, y e minister di finansas a firma tambe cu sr. Briesen a representa na e momento di firma e MB. OM a conclui pesey cu nan NO TA COMPARTI E OPINION DI CAD cu sr. Briesen a kibra e ley di contabilidad! (Pag.4/6)
Decision di OM: Cu e material di evidencia y dossier cu a wordo presenta na OM pa acusa sr. Edison Briesen no por demostra cu tabata tin malversacion y falsificacion di documentonan. E decision di OM tabata negatief y cu nan ta “wijs af” e acusacion contra sr.Eddie Briesen y ta dicidi pa no persiguie penalmente. OM ta finalisa bisando cu e no ta haya esaki oportuno y na su lugar. (Pag.5/6)
E documento aki di OM tur hende den AVP ta ignora y no kier papia di dje. Sinembargo tur esaki mester a hunga un rol importante banda di tur otro conseho huridico cu Mike de Meza a ricibi, pa NO persigui sr. Eddie Briesen mas den e caso di LTA. Esaki tabata otro sla pa e mal intencion di AVP den e caso aki di “vrijwaring” contra sr. Briesen. Kiermen, ki otro opcion AVP tabata tin? AVP a kibra e contract, AVP no por a haya OM pa persigui sr. Briesen, AVP a sinta negocia pa paga LTA segun Mike de Meza, Hof den su vonnis di 22 di November 2016 a bisa cu (1) e contract tabata tin mester di continuacion y sr. Briesen a actua corectamente, (3.9 vonnis), cu e (2) contract tabata legal, (3.10) y finalmente cu e ley di contabilidad no a wordo kibra (3.11)! Asina pueblo por conclui cu AVP a causa cu pais mester a paga 2.1 miyon pa nan culpa. Caso cerrado.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
