Parlamentario Miguel Mansur di accion 21 ta kere cu Aruba ta den un stagnacion economico y no ta mira cu tin movecion pa corigi e problemanan structural cu e economia tin. E gastonan di opera un negoshi na Aruba ta hopi halto y parlamento a caba di pasa e ley di BBO na frontera cu ta bay haci e situacion mas dificil ainda. Segun Parlamentario Mansur dia e gremionan a bin staten loke cu nan a pidi ta un reforma fiscal comprensivo. Esaki kiermen cu gobierno ta financia su mes, sector publico ta financia su mes door di cierto belasting, invoerrechten pero Aruba a yega na un punto cu e nivel di belasting no ta competitivo mas.
Segun parlamentario Mansur loke cu comercio ta pidiendo pa Aruba reforma con ta financia e sector publico cu ta encera cuanto belasting ta keda pone riba e ciudadano. Si mester mira na Aruba e ciudadano ta pagando hopi belasting y e servicio cu nan ta haya bek di loke nan ta paga no ta adecuado.
E estado di nos infrastructura, scolnan publico,cuanto ta tarda pa manda un pashent afo si e mester di cuido medico ta laga hopi di desea, servicionan di gobierno mes na momento cu ta pidi un bouwvergunning porehempel y asina por keda menciona diferente departamentonan di gobierno cu no ta traha eficiente menos e departamento di censo Aruba, segun parlamentario Mansur.
E pagado di belasting ta pagando hopi placa y ta haya un servicio inadecuado. Segun parlamentario Miguel Mansur realmente Aruba tin mester di un reforma structural y ta loke cu comercio tambe ta pidiendo. Sinembargo te ainda no ta wak cu gobierno ta duna atencion na esaki den su dos aña di mandato, pero si ta wak lapimento.
Na momento cu mester wak e nivel di pobresa unda cu famianan ta practicamente bao di awa unda cu e gastonan ta mas halto cu nan entradanan y e unico manera pa por corigi esaki y trece alivio pa e pueblo pero tambe crea un economia of espacio pa economia crece ta un reforma fiscal comprensivo cu ta haci nos mas competitivo, mientras cu Aruba ta sigui financia y mehora e servicionan publico. Esaki ta un problema grandi mirando cu no ta mira e cambionan aki pa Aruba.
Sinembargo loke cu ta tuma nota di dje ta cu gastonan ta sigui subi pa comerciante y e no ta wordo debolbi den un servicio pa miho funcionamento den sector publico y esunnan cu ta sali perdi ta comercio y pueblo. Na momento cu ta papia di comerciante ta hende nan cu ta risca nan placa priva cu ta placa cu nan a spaar of cu nan a fia na banco of placa cu nan a hereda y ta inverti y hinca den e economia di Aruba. E comerciante ta risca nan fondonan pa purba haci un negoshi pa nan gana placa pero na mes momento e negoshi ta paga su belasting y e ta emplea hende y tambe ta paga inkomstenbelasting ect ect , asina e economia di Aruba ta funciona.
Loke ta un realidad e dunado di trabao mester di e trahado y e trahado mester di e dunado di trabao y tur dos mester di un gobierno eficiente cu ta apoyonan pa crece den oportunidadnan pa e trahadonan bay dilanti profesionalmente pero tambe oportunidadnan pa inversionista y nan capital por rindi y sigui expande.
Segun Parlamentario Miguel Mansur awor aki no ta mira suficiente inversion ni den sector priva y tampoco den sector publico, esaki ta debi cu no tin suficiente oportunidad pa gana placa. Oportunidad pa gana placa falta debi cu e sector publico ta mucho costoso y e no ta eficiente y no ta brinda un bon servicio ni na e pueblo y tampoco na comercio.
Ta kere cu gobernantenan mester tin e corahe pa reforma, aunke e ta controversial debi cu ta trapa riba tenchi di algun hende, pero si kier pa Aruba ta exitoso y kier pa tur hende na Aruba beneficia di e industria turistico y e otro industrianan cu nos tin Aruba mester reforma.
Aruba tin un economia riba 6 biyon florin pa un poblacion di 100 mil hende esaki ta pone cu no tin un motibo pa tin pobresa na Aruba y necesidad economico, pero mester tin e curashi pa tuma e pasonan pa haci cambio.
Click aki bao like y share