Accion di Bario ta produci resultado na Esso Heights
E mehoracion di e basketball court na Esso Heights Park ta un ehempel concreto di con Accion di Bario ta sigui produci resultadonan positivo den diferente bario rond di nos isla. E instalacion algun luna pasa di iluminacion LED nobo a crea un ambiente mas sigur y accesibel p’e muchanan, hobennan y famianan cu ta uza e parke diariamente.
Parlamento den contacto cu nos barionan
Recientemente, Parlamentario di Fraccion AVP Otami Thomasia a bishita e basketball court pa constata personalmente e resultado di e mehoracionnan. “Siguridad semper ta un prioridad. Cu e iluminacion nobo aki, nos hobennan awor tin un luga sigur unda nan por reuni, hunga basketball, core y participa den actividadnan recreativo”, Thomasia a declara. Segun e parlamentario, e mehoracion no solamente ta beneficia e deportistanan, sino tambe nos muchanan y e famianan cu ta uza e parke regularmente. El a enfatisa cu e iluminacion nobo ta crea un ambiente mas sigur y agradabel pa e comunidad. Esaki ta refleha den e entusiasmo cu e muchanan ta mustra durante nan entrenamentonan, disfrutando di un espacio cu awor ta mas accesibel, funcional y sigur. Parlamentario Thomasia a subraya tambe cu mantencion y proteccion di facilidadnan publico ta un responsabilidad comparti entre gobierno y comunidad. “Tur cos cu ta mehora den nos bario, nos tur mester haci nos parti pa cuida y conserva esey”, Thomasia a enfatisa.
E parlamentario a gradici tur persona cu a contribui na realisacion di e proyecto, incluyendo e habitantenan di Esso Heights, e boluntarionan, e entrenadornan y otro colaborador cu a brinda nan apoyo durante e proceso. “Tin hopi persona cu ta dedica nan tempo boluntariamente pa guia y orienta nos hobennan. E trabou cu nan ta haci tin un balor inmenso pa nos comunidad”, Thomasia a declara. Na final di su bishita, Thomasia a enfatisa cu Aruba mester sigui inverti den espacio recreativo y sigur pa nos hubentud. “Nos hobennan mester di guia, oportunidad y varios luga sigur pa desaroya. Un proyecto manera esaki ta contribui directamente na esey”, Thomasia a conclui.
Vision y ehecucion na bienestar di nos barionan
Durante e accion di bario cu a tuma luga den luna di februari na Esso Heights, Prome Minister Mike Eman, hunto cu diferente departamento di gobierno, a bishita e area y a sostene dialogo directo cu habitantenan pa tende nan preocupacionnan y identifica necesidadnan cu mester atencion. E accionnan di bario no ta limita nan mes unicamente na bishita di e casnan. Nan ta inclui tambe evaluacion di e espacionan recreativo, facilidadnan deportivo y otro aspecto importante pa e calidad di bida den e bario.
Durante su bishita na Esso Heights, Prome Minister Mike Eman a observa cu e area di e parke tabata necesita no solamente limpiesa y mantencion, sino tambe mehoracion di e facilidadnan existente. Un di e necesidadnan identifica como prioridad tabata e falta di iluminacion den e parke. E basketball court, cu regularmente ta wordo uza pa actividadnan deportivo, tabata enfrenta limitacionnan pasobra falta di lus tabata obliga diferente actividad pa para mas tempran. Pa permiti cu e actividadnan deportivo por continua y pa crea un ambiente mas sigur p’e usuarionan, a tuma e decision pa instala iluminacion nobo den e parke. Awor cu e sistema di iluminacion ya ta completamente funcional, e comunidad por beneficia di un facilidad mas accesibel y sigur durante e oranan di atardi y anochi. Hopi biaha Prome Minister Mike Eman ta enfatisa cu “e barionan ta e berdadero curason di nos pueblo” y cu un desaroyo solido di nos comunidadnan ta fundamental pa futuro di Aruba.
E resultado aki ta un muestra con comunicacion directo entre comunidad cu gobierno y accion rapido por yega na solucionnan concreto cu ta mehora calidad di bida den nos barionan pa un y tur.
