Manera tur hende por mira ni Gobierno ni Coalicion den Parlamento ta duna informacion riba e Rijkswet HOFA. Esaki ta e ley cu ta bay kita nos autonomia, nos derecho di por dicidi riba nos maneho y finansas. Si e ley aki ta asina bon, dicon Gobierno no ta papia di esaki?
Reunion cu Gremio Comercial y Sindical
Fraccion di MEP ya caba a reuni dos biaha cu tur gremio. Loke nos a presenta na nan ta e motibonan dicon e ley aki no ta bon pa Aruba. Entre otro Hulanda mes a haci un evaluacion riba e ley aki na Corsou y Sint Maarten, y nan a conclui cu e a stroba nan economia di crece. Banda di esey tambe e ta duna autoridad na Hulanda pa dicidi riba bo placa di belasting y por ultimo nos no lo por sali mas for di e ley aki, pasobra e no ta caduca automaticamente.
Conseho Huridico di Profesor Elzinga
Nos fraccion a busca tambe conseho huridico di un experto hulandes riba e tematica aki. Profesor Elzinga a traha mas di 10 aña na Universidad di Aruba y actualmente ta traha na Universidad di Groningen. E ta specialisa riba “staatsrecht” y “koninkrijksrecht”. E a conclui cu e ley aki no ta beneficioso pa Aruba.
Argumento di AVP cu Evelyn a Firma
E unico cos cu Gobierno ta trece pa dilanti ta cu Evelyn a firma. Profesor Elzinga a bisa bon cla den su conseho cu locual Evelyn a firma no ta un Rijkswet y no ta mara Aruba. E ta simplemente un intencion pa negocia.
Pa Conclui
Adhunto cu e articulo aki ta pone e frase di profesor Elzinga caminda boso mes por lesa cu e ta bisa cu locual Evelyn a firma no ta mara Aruba. Pueblo puntra bo mes, si e ley aki ta asina bon pa Aruba, dicon Gobierno no ta sali duna ningun informacion al respecto?
